Moreh nung Myanmar nunger ka apu

Imphal, Rongjui/September 19 (Agencies): Mongolbarnü 43 Assam Rifles sepaitemi Myanmar nunger ka Aadhaar card taila bener senzüa lia Tengnoupal district kübok Moreh jila nung puogo. Pa den külemi pa nem teyari agütsür local agent pezü tashi puogo.
Osang ajanga ashiba agi, Myanmar nungba tenüng ya Zaylin Naing Abdullah ta jangjaogo. Pa Myanmar, Mon State kübok Molpin nungi lir aser pa Uttar Pradesh Saharanpur tesem nung Deoband nungi Moreh-i aruya liasü.
Osang ajangsa, Abdullah ya Deoband nung Islamic Studies nung küm ka course agitsü asoshi India-i aru aser pa Moreh ward number 3 nung alir Sayed Ali dangi anir oya liasü.
Assam Rifles sepai telok kati Moreh College anasa mobile vehicle check post ka nung pa apu.
Abdullah indang Aadhaar card nung tenüng aser address ya pa senzüa aliba gari anisang den kasa dang liasü. Iba sülen Sangaiyumpham, Thoubal district nung alir gari anisang Abdul Rehaman dena apu aser sepaitemisa sen lakh 7.5 nguteta liasü.
Tang agent asem ya Sayed Ali, Hanif Ahmed aser Md Hafizudi ta jangjaogo. Gari anisangi kuli agütsüba sülen parnok asem apu.
Gari anisangi ashiba agi, Lilong nung alir Nasir Ahmed taser nisung kati sen ya pa nem amoktsü aser Hanif Ahmad aser Mohd Hafizudin na nem agütsütsü liasü. Paisa taoba mapang trokben tashi pai Nasir ket nungi sen meshizüka Hanif o Hafizudin na nem bener oa agütsüogo, ta ashi.
Maneni paisa, August 12 nü Myanmar nunger ana Imphal Airport nungi anir oa Namphalong, Tamu, Myanmar nung nisung ka tenüng agi Sanu tongtsüogo, ta metetdaktsü.