Morigaon nung aluyimer ka suseta asü

Guwahati July 26 (Agencies): Mongolbarnü Assam tzümetsüng lendong nung kiojen aser alu ajak raksatsüba sülen nisung ka suseta asü. Iba tatalokba ya Morigaon’s Bhuragaon, Aambagan nung atalok aser aluyimersang tenüng ya Peetal Chauhan ta jangjaogo.
Osang ajanga ashiba agi, Tzümetsüng ajanga ki, alu ajak apongtokba aser sorkar nungi teyari kecha manguba ajanga Chauhan kanga mepelai liasü aser iba ajanga pai jenjang agitsüsa aküm.
Anogo asem tejakdang kasa district kübok Bordubatop yimtsüng nung alir Kushal Nath, tzümetsüng nung pa rongsen ajak samaba sülen suseta asü.
Assam State Disaster Management Authority (ASDMA), sangdong ka ajanga ashiba agi, Lakhimpur, Biswanath, Barpeta, Morigaon, Nagaon, Karbi Anglong, Golaghat, Jorhat, Sivasagar, Karimganj aser Cachar district tem nung nisung 90,000 shi tzümetsüng agi kongshir kangshidar.
Taoba Hokolbarnü tashi nung tzümetsüng arushiba ajanga state nung district 14 nung alir parnok lakh 1.65 dak kongshir lir.
ASDMA-isa ashiba agi, tang state nung yimtsüng 294 aser aluyimba li hectar 20,000 tzü agi metsüngbanger lir.
District ajak rongnung tzümetsüng ajanga tamajungtiba kongshibaji Golaghat district lir, kong nisung 31,000 dak tema iba lendong agi kangshidar aser iba sülen Barpeta tesem lir, kong nisung 17,000 dak tzümetsüng agi kongshir lir. Ketdangsertemi district ti nung relief camp aser distribution centres 58 lapoka lir kong parnok 11,611 jenoka lir. Iba den külemi tzümetsüng lendong nung asür parnok 76 ajungba osang ajanga metetdaktsü.