Morocco-i AU nung tanaben züngsemtsü onük benoker

Addis Ababa, September 24 (Agencies): Morocco linüki küm 40 shi süidaktsüba sülen African Union (AU) nung tanaben züngssemtsü onük benokba osang ka AU lenirtemi metetdaktsüogo.
“Morocco linük AU nung tanaben züngsemtsü onük densemba shiti ka Morocco foreign affairs advisor-i AU Commission mendenbula, Nkosazana Dlamini-Zuma ket tan Brehostibar nü tongtsüogo,” ta AU-i tanü sangdong ka ajanga metetdaktsü.
Morocco nungi shiti agizükba sülen par linük AU nung tanaben züngsemtsü onükji AU linüktemi benoka jembiba sülen parnoki lemtetba osang Morocco chuba, Mohammed VI dang metetdaktsütsü ta Dlamini-Zuma-i telangzüba agüja lir.
AU-i peisasa pei madak yimsü asütsü temeten ngua alir linük ta züngshir, Western Sahara den sentakba mangatettep ken o adokba sülen Morocco-i AU tentet 1975 küm toktsü.
Morocco-i tesüiba mapang Spain yimli kübok aliba Western Sahara 1975 küm tashiyim agi agiba sülen Western Sahara-ji par anülulentip tsütsülen densemba province ka ama züngshir.