MoS Telecommunication ajanga India Mobile Congress sayatsü

Noksa nung Manoj Sinha (abelen nungi pezübuba) den COAI indang Director General, Rajan S Mathews (abelen) aser ketdangsertem noksa nung angur.

New Delhi, June 02 (Agencies): Union Minister of State for Telecommunication, Manoj Sinha-i tanü India Mobile Congress 2017 (IMC 2017) sayatsüogo aser ibai linük nung Telecom, Internet & Mobility ecosystem den ICT, App yanglur, innovator aser start-ups purtem asoshi sapang tuluba aser mezüngbuba asütsü.
“India Mobile Congress ya telecom industry nung sentong tulutiba asütsü aser iba ajanga industry nung ketdangser aser sorkar atema sapang ka yanglutsütsü,” ta iba sendong aser logo sayaba mapang Sinha-i ashi.
COAI, K aser D Communications Limited dang iba sentong ayongba asoshi pelaba osang ka Minister-i ashi aser akok tashi yaritsü shisem. Iba sentong ajanga Ato Kelonser indang digital India nükla asoshi jenjang tajung yanglutsür.
“COAI den külemi K aser D Communication Limited ajanga iba sentong ‘world class environment’ jenjang nung inyakdaktsütsü asoshi inyakteptar. India Mobile Congress ya India nung kanga tongtipang sentong ka südaktsütsü,” ta iba sentong nung COAI indang Director General, Rajan S. Mathews-i jembidang ashi.
India Mobile Congress ya 2017, September 27 nungi 29 tashi New Delhi nung aliba Pragati Maidan nung amongtsü aser iba sentong nung sorkar, Telecom Service Providers (TSPs), handset yanglur, Internet giants, ISPs, Global technology ketdangser, AI & VR company tem, Mobility lenir, Academia, Start-ups aser App yanglurtemi shilem agitsü.