Mosque atema lemzüktsüba liji yimti nungi talangka pilar: Muslim litigants

Ayodhya (Uttar Pradesh), Tsüklai/February 06 (Agencies): 1990s mapang nung Uttar Pradesh kübok Ayodhya nung Hindu nungeri Babri Masjid raksatsüba sülen ibaji melena mosque yanglutsü asoshi tawa lemzüktsüba li agi melung masüba olen ka Ram Janmabhoomi-Babri Masjid ken o nung Muslim nunger tenüng nung ken o benokertemi metetdaktsüogo.
Yaküm November ita nung Supreme Court-i Ayodhya nung mangatettep li nungji Ram tekülem ki yanglutsü atema ita asem tsüngda trust ka tentettsü asoshi obendang agütsü.
Supreme Court-isa Centre dang mosque ka yanglutsü atema Muslim nunger nem ali acre 5 agüjang, ta tuyua liasü.
Iba tetuyuba nungji ajemdaker mosque yanglutsü asoshi tawa Uttar Pradesh sorkari Sunni Waqf board nem Ayodhya kübok Lucknow highway nung aliba Dhannipur yimdak ali agütsü. Iba tesemji district headquarters nungi kilometer 18 shi pilar lir.
Brihostibarnü Muslim litigant, Mohammad Umar-i, iba tesemji tongtibang tesem ka masü aser yimti nungi kanga pilar, ta mepelai metetdaktsü.
Paisa, “Supreme Court-i, Ayodhya nung aliba tongtibang tesem ka nung iba liji lemzüktsütsüla ta tuyua lir, ajisüaka iba tesemji kilometer 25 pilar yimtsüng ka nung lir, gari lenmang nungi pilar aser tongtibang tesem ka masü,” ta metetdaktsü.
All India Muslim Personal Law Board nung züngsem, Zafaryab Jilani-ia, jila ka tenüng melenshiba aser municipal tesem ulushiba ajanga iba liji Ayodhya nung lir, ta ashitsü makok, ta metetdaktsü.