Mosul nung ‘Civilian’ tem asüba tali akümer

Mosul (Iraq), March 2 (Agencies) : Iraq nung aliba province rongnung Mosul nung US-i aniba teloki February ita Islamic State (IS) telungpurtemi amanglemer aliba anüolen tesem kanga sashia mita aser maka aoba mapang civilian timba süogo, aser ibai tanga mapang nung asüba tang nungi timba lir, ta UN-i asadangteta lir.
February ita kiralongrartemi amakdang, khatepdang aser prongpong o tapoktsü lendong balala ajanga iba tesem nung civilian 329 süogo aser 613 tashi yiru, ta UN Assistance Mission for Iraq (UNAMI)-i sangdong ka ajanga metetdaktsü.
Iraq nung military temi IS ket nungi Mosul meyipa agitsü asoshi mita aoba mapang takok angutsü merangdang civilian timba akoksa.
Taoba ita Ninewa governorate (state) nung nisung tasüba aser tiyiruba timtiba ataloka liasü. Iba state nung nisung 201 asü aser 250 tashi yiru.
Aji oda süaka UNAMI-i, “Kodang lendong atalokba tesemtem ajak nung kanga junga mita bushisüngdangdir ano tasübaji iba dang nungi timba ngutettsü,” ta ashi.
“Onok dak anünglen nungi tapoktsü aika pokloktsüja liasü. Anepdang nungi nikongdang tashi item tapoktsü pokloktsü, anungji onok pei kidang nungi madokteti timtem,” ta tawa ki doktsür jena aoba, Iraq tsür, Sakna Younis-i osangbenertem dang ashi.
February 28, 2017 tashi nung nisung 16,500 shi pei ki doktsür jenshia lir aser parnok rongnung nisung 8,800 shi ang emergency tejenokdak tesem tonga lir, ta Office for the Coordination of Humanitarian Affairs (OCHA) sangdong ka ajanga metetdaktsü.
Nisung 85,000 tashi tang aliba emergency tejenokdak masemer aser ano nisung 750,000 shi Mosul anüolen rara tesem nungi mejenteti lir, ta UN-i asadangteta lir.