Mosul nung ISIS-i EC nung inyaker 300 tepset

Mosul, August 09 (Agencies): Honibar nü Iraq yimti, Mosul nung aliba military camp ka nung Islamic State (IS) kiralongrar telok firing squad kati Iraq Supreme Electoral Commission nung inyaker 300 kahsetogo, ta tenük kuli alirtem aser security ketdangsertemi ashi.
Nineveh province yimtiba, Mosul nung National Multitude otongdar, Mahmoud al-Sauaryih-i, Al Gazlani camp nung kahsetertem rongnung tetsür 50 liasü, ta ashi.
Ano külen Electoral Commission national office osang ka ajanga, IS jihadist temi Electoral Commission nung inyakertem telok ka terok nung ranga tepset, ta ashi.
Commission-i international community, UN aser meimchir temeten tentettem dang, ‘tang Iraq nübur anema inyakbatem aser tepsetbatem ya anendaktsütsü asoshi mera agidaktsüner,” ta mepishiogo.
Asür kibongtemi, parnok tepsetba osangji kiralongrartemi parnok nem metetdaktsüogo saka parnok tasümangjibo magütsü, ta ashi.
Yaküm June 10 nü IS-i Mosul yimti agia liasü aser iba mapang nungjagi tenzüka parnoki northern Iraq nung yimti aika agiyonga odar.