Mother Teresa ajanga asenok nüma atangtsüla: PM Modi

Hangzhou/New Delhi/Mumbai, September 04 (Agencies): Deobarnü Vatican nung Pope Francis-i Mother Teresa nem ‘temeshi nisung’ ta tenüng jaloktsüba sülen Hangzhou, China nung India Ato kilonser, Narendra Modi-i, “Mother Teresa nem ‘temeshi nisung’ ta jaloktsüba ajanga nüma atanger,” ta ashi.
Tang Modi ya G-20 senden nung adentsü atema China-i oa lir aser tanü pai twitter ajanga, “Mother Teresa nem temeshi nisung jaloktsüba ya mamatettsüsa aser nüma tangtettsü mapang ka lir,” ta ashi.
August 28, 2016 nü ita shia radio sentong ‘Mann Ki Baat’ ajanga linük nüburtem den jembidanga Modi-i, Kolkata nung sensaker aser lenimaortem tenzükla, Mother Teresa nem tenüngsang agüja liasü aser tanü-a pai iba indang ‘link’ ka agütsü.
“India nunger ka ama Bharat Ratna award angula, Mother Teresa nem temeshi nisung jaloktsüba atema asenoki nüma atangtsüla. Lai sensakerten atema taküm bendanga agüja tenzük. La Albanian tsür liasü, aser English oshiji la tetsümeli masü, saka lai ibaji lar oshi ama agia sensakertem tenzük,” ta Modi-i radio sentong nung jembia liasü.
Mother Teresa 1997 küm asüba sülen Arogo nung sayatenya ana atalokba sülen taküm March ita nung Pope-i la nem temeshi nisung nüngja agütsütsü ta sangdonga liasü.
Mumbai nung Yisu  kürakyanglu raksatsü
Ano Mumbai nungi tanga osang ka nung tanü Vatican nung Mother Teresa nem ‘temeshi nisung’ naroküm agütsüba sülen nisung tamajunger kari Mumbai, Juku Tara road nung aliba Yisu Khrista indang kürakyanglu raksatsüogo.
Osangbenertem den jembidang melungtet telok kati, police ketdangser kari kulitem samatsüogo, ta tai tongloktsüba den külemi, aibelenertem aser police ketdangsertem anema ken o benoktsüla, ta takhangba ka agütsü.
Mother Teresa sür küm 18 sülen la nem iba naroküm agütsüogo. Missionaries of Charity tentetla, Teresa-i Calcutta yimti lenmang nung asütsü tia nung alir nisung merirjang aika nem teimla tasen agüja tenzüka liasü, aser tanep St Peter’s Basilica kima sentong ka nung la nem iba naroküm agütsü. Iba sentong nung nisung 100,000 dena liasü, aser India nungia Foreign Minister, Sushma Swaraj leniba nung teshimtet telok ka oa denogo.