Mother Teresa indang film yanglutsü tetemsü: Shyam Benegal

Kolkata, September 05 (Agencies): Mother Teresa, shibai sensakertem aser lenimaortem tenzüka liasü, la indang taküm otsüji film screen nung sayutsü tetemsü, ta India nunger nüngtugu film yanglur, Shyam Benegal-i ashi.
1929 küm Albania nungi India-i arua 1948 küm Missionaries of Charity tentetla, Teresa indang taküm otsü nung film yanglutsü atema Benegal-i mulungogo, ta osang ka sangdonga liasü.
Lonavla International Film Festival India (LIFFI) sentong nung interview ka agidang Benegal-i osangbenertem dang, “Shingaia kü dang ibaji inyaktsü masüngdang. Iba atemaji benoka liasü, ajisüaka tangbo meinyaktsü. Iba mapang nungji ni Netaji Subhas Chandra Bose indang taküm otsü film teyangludak liasü. Iba mapang nungji ni Calcutta nung liasü, aser Missionaires of Charity nungia nisung kar arua ni ajuruogo,” ta ashi.
Dadasaheb Phalke Award angusang arishi küm 81 Benegal-i, “Mother Teresa indang project atema sen aika nüngdaktsü, kechiyong ibaji ‘International film’ ka asütsü. Ibaji asen nüburtem (India nunger) atema dang masü saka sobaliba balala nungi nisungtem, talisa Europe aser America nunger atema-a asütsüla,” ta ashi.
Paisa ,”Feature film tajung ka yanglutsü atema la temsüa lir,” ta ashi.
Taoba mapang nunga Mother Teresa indang film tem yangluogo- 2003 küm documentary, ‘Mother Teresa of Calcutta’, 1987 küm Mother Teresa documentary aser 1997 küm “Mother Teresa: In The Name of God’s Poor” tangoka sayaogo.