Motors Vehicle Act nung temelenshi nüngdaker: Transport Ministry

New Delhi, April 22 (Agencies): Linük nung gari lenmang lendongtem ajema akumtsü atema sorkari inyakba dak sentakba nung Hokolbarnü Road Transport & Highway Ministry-i, Motors Vehicle Act nung temelenshi kanga rongtak nüngdaker, ta metetdaktsü.

“Brasilia Declaration nung tezüngzüktep agir züngsem ka ama, India-i 2020 küm tashi nungbo gari lenmang nung lendong aser item lendong ajanga nisung asüba shilem 50 agi tajemba kümdaktsütsü atema inyaktsü. Lenmang sector ajanga India rongsenkettsüng ainba nung yaritsü atema tejen ozüngtem intoktsü atema rongdak temelenshi nüngdaker,” ta Ministry-i sangdong ka ajanga ashi.

‘Brasilia Declaration’ ajanga küm 10 tsüngda nükjidongtem aser Sustainable Development Goals ataloktsü atema mera balala tuyua lir.

Item tetuyuba rongnung gari lenmang anepaluba, ozüng aser ozüng benokertem, lendong mataloktsüsa lenmang jenjang tajungba aser transport jenjang tajungba akumtsü densema lir.

State tem nungi Principal Transport Secretary tem aser Transport Commissioner tem senden ka mena onük balala nung o lemtepba sülen Road Transport & Highway Ministry-i iba sangdong agütsüogo.

State tem nungi transport Group of Ministers (GoM) senden April 29 nü amentsü jelia iba senden menogo.