Moudgil aser Chandela na Olympics nung asayatsü maongka nguogo

Rongjui/September 3, 2018 (Agencies): Tentonü ISSF World Championship nung tetsür 10m air rifle event nung Anjum Moudgil-i silver aser Apurvi Chandelac pezübuba jenjang nung tembangba sülen India nunger shooter tem rongnungi 2020 Olympics nung shilem agitsü asoshi maongka angur rongnung mezüngpur kümogo. Korea tsür Hana Im (251.1) sülen Moudgil tanabuba jenjang nung tembanga silver medal angu aser Korea tsür sa Eunhea Jung-i (228.0) bronze medal angu.
Arishi küm 24 tani Moudgil-i point 248.4 nguteta India senior squad atema mezüngbuba medal kokteta liasü. Kasa mapang nung India tsürsa Chandela-i point 207 nguteta jenjang pezübuba nung tembang saka Olympic nung shilem agitsü asoshi maongka nguogo, kechiyong linük ka nungi iba event nung asaya anati shilem agitettsü.
International Shooting Sport Federation’s (ISSF) asayamung ya kanga tongtibang lir, kechiyong iba asayamung ya Tokyo Games atema Olympic quota event mezüngbuba lir aser iba asayamung nung event 15 nungi menden 60 tashi koktettsü maongka lir.
Qualifications nung Moudgil aser Chandela na jenjang pezübuba aser trokbuba nung tembang. Tena Olympics nung shilem agitsü asoshi maongka nguaka inyakyim nung aliba ama National Rifle Association of India (NRAI) puri tatembangbuba telemtetba agitsü.
Tebur 10m air rifle event nung Asian Games medallist Deepak Kumar-i qualification-bo ajangtet saka jenjang trokbuba nungang tembang.