Mourinho-i Manchester United Manager akümtsü terenemshiba agir

London, May 24 (Agencies): Portugal nunger football manager, Jose Mourinho-i par mangdang asangsang nung ajangzüktsüsa Manchester United FC telok manager akümtsü asoshi terenemshiba agiba osang angazükogo.

Taoba küm 2 tashi Manchester telok manager inyakba sülen yashi, Hombar nü manager menden nungi anentsüsang, Louis van Gaal melenzüka, Manchester telok manager tasenba akümtsü asoshi Mourinho-i renemshitsü tenzüker lir.

Britain nung ayongba tongti football asayamong, 2015/16 Premier League nung Manchester teloki 5 buba jenjang ajangzüka bilemba ama junga shilem magitetba yong Louis manager menden nungi anentsü.

“Kü lenisüba kübok ozü Manchester teloki FA Cup takok marok agizüker ghonda 48 tsüngda nung ni manager menden nungi anentsütsü lemtetba atema kanga sasar,” ta Louis-ia metetdakja liasü.

Asayartem den mangatettep adokba yong Chelsea telok kibur, Roman Abramovich-i Chelsea telok manager menden nungi yaküm, 2015 küm December ita anentsüsang, arishi küm 53 tain Mourinho-i tan Manchester telok manager akümba ajanga football sabang nung pa tenüng tajungba kümdaktsütsü maongka tajung angur asütsü.

Mourinho Manchester telok manager tasenba shimdaktsütsü asoshi par ketdangser, Jorge Mendes-ia Manchester kibur den tanü ajurutepba osang jangjaogo.