Mourinho-i Manchester United manager inyak tenzükogo

London, July 05 (Agencies): Manchester United manager tasenba, Portugal nunger Jose Mourinho-i United manager inyak tenzükba osang ka tanü, Mongolbar nü metetdaktsüogo.
Taoba küm 3 tashi takok monguteti süidaktsüba amadoker tarutsü mapang takok angutsü renemshitsü asoshi Mouinho-i par United asayartem ayongzük.
Alima ajunga nungi osangbenertem den tanü ajurutepdang Mourinho-i tongti asayartem par telok nung anioksemba, Wayne Rooney nem striker shilem asayadaktsütsü aser Ryan Giggs-i par telok toktsüba osangtem lemsatepa liasü.
“Ki ajak aginer. Ni asaya ajunga kokner. Ni asaya junga asayadaktsüner. Ni goal takok ngua agütsüdaktsüner,” ta arishi küm 53 tain Mourinho-i sangoktsü.
Paisa ashiba agi, United teloki yaküm anguba 5 buba jenjang den temaba jenjang anguba agi temulung masütsü saka par teloki taoba mapang ama temaba jenjang ngua takok marok angutsü nungdaka kümogo.
United teloki takok ngua asayatsü nükjidong nung Villarreal defender, Eric Bailly aser PSG striker, Zlatan Ibrhimovi na par telok nung tawa anioksemba den külemi, Dortmund midfielder, Henrikh Mkhityaran-a par telok nung anioksemba osang jangjaogo.
Ano, Juventus asayar, Paul Pogba par telok nung anioksemtsü asoshi dollar sen million 131.37 jenjang aketba tezüngzüktep agitsü renemba osanga angazükgo.
Taoba mapang Chelsea telok manager inyaksang, Mourinho-i taoba United manager, Netherlands nunger Louis van Gaal melenzüka United manager tasenba akümer lir.
Mourinho lenisüba kübok par United teloki par mezüngbuba asaya Borussia Dortmund telok den Shanghai nung ayongba International Champions Cup asayamong nung tan July ita 22 nü asayatsü renema lir.