Mourinho Manchester United manager tasenba akümer

London, May 27 (Agencies): Manchester United teloki par manager tasenba inyakdaktsütsü asoshi Portugal nunger Jose Mourinho shimba osang ka tanü, Hokolbar nü metetdaktsüogo.
Mourinho-i taoba Manchester telok manager, Louis van Gaal melenzüka Manchester telok manager tasenba akümer lir.
“2016/17 nungi tenzüka, taruba küm 3 tashi Manchester United telok manager inyaktsü asoshi Mourinho den tezüngzüktep agiogo. Iba küm 3 tembangba sülena pai maneni manager inyaknüra, 2020 küm tashi inyaktsü lenmanga lapoka yuogo,” ta Manchester teloki osang jangjashitsü.
Arishi küm 53 tain Mourinho-i taoba küm 10 tsüngda nung Europe nung tentetba temaba telok balala nung manager inyaka, pa lenisüba kübok Portugal, England, Italy aser Spain densema, linük 4 tashi nung ayongba tongti asayamong takok marok jenti agizükba den külemi, nungtugu UEFA Champions League takok maroka anaben tashi agizükba osang bushitetogo.
“Mourinho ya alima ajunga nung manager tajungtiba lir. Pai Europe nung ayongba asayamong balala indang takok marok agizükba den külemi, pa ya Premier League asayamong kanga junga angatetba manager ka lir,” ta Manchester United nung Executive Vice-Chairman, Ed Woodward-i metetdaktsü.
“Manchester telok manager inyaktsü jenjang ajangzükba ya maongka tulu angur lir kechiyong Manchester telok ya alima ajunga nung nungtugu telok ka lir,” ta arishi küm 64 tain Mourinho-ia metetdaktsü.