Mowgli film nung Saif-i kü nem Kaa shilem agidaktsünü: Kareena

Yimpoksüi/November 26, 2018 (Agencies): Tawa sayaba Netflix indang Mowgli: Legend of the Jungle Hindi trailer sayaba nung Kareena Kapoor Khan-i ngum Kaa shilem agiba ajanga ajak atsüa aruogo. Rudyard Kipling indang classic The Jungle Book stories nung ajemdaker yangluba film nung Anil Kapoor, Madhuri Dixit, Abhishek Bachchan, aser Jackie Shroff nungeria shilem agiba angutsü.
Kareena-i iba film nung shilem agitsü mulungtetba aser la indang character indang jembia liasü. “Nisung ajak The Jungle Book repranga intet. Lanuwa peyong Mowgli, Bagheera, Baloo aser tanga character indang den alir ama inogo. Item character tem asen taküm nung liogo, aser tang Netflix amala sabang ka nung reprangtsü ya jangratemtsüka lir,” ta lai Amungnü iba film Premier mapang ashi.
Actors Christian Bale, Madhuri Dixit, Abhishek Bachchan, Anil Kapoor, Freida Pinto, Kareena Kapoor aser Director Andy Serkis nunger Mowgli film premier nung dena liasü.
Film nung character tem indang jembidang lai tesakloktiba character ji Kaa liasü, ta Kareena ashi. “Iba project nung shilem agitsü asoshi kü nem maongka agütsüba mapang Saif (Ali Khan)-i kü nem Kaa shilem agitsü agütsü imlaa atar ta ashi, kechiyong iba character ya kanga tashitait aser balaka lir, anungji ni iba shilem agitsü kanga pelaa bilemer,” ta lai ashi.
Kareena-isa ashiba agi, iba tajangshiba ya la asoshi balaka liasü. “Kü fan temi ni film tem nung kasa shilem dang agiba nguogo, saka ni teti shilem balaka agitsü meranga aruogo aser tang iba film nung Kaa shilem agiba ya ajak asoshi balaka asütsü,” ta kareena-i ashi.