Mozambique nung asür 417 jungogo

Beira, Metsüremi/March 23 (Agencies): Southern Africa nung yipru tesashi ka süia tsümetsüng aruba sülen Mozambique nung asür 417 jungogo, ta Land and Environment Minister Celso Correia-i Honibarnü ashiba den tensa ano kanga mejungi lir, ta shisem.
Taoba hopta cyclone Idai-i Mozambic kübok tzüküm nung aliba yimti Beira kanga mejungi kongshi aser iba sülen Zimbabwe aser Malawi dak kongshiogo, kong kiojen raksatsüba den nüburtem million aika lendongbang nung toktsü.
“Tensa tera tajungba kümdar saka ano kanga timtem nung lir,” ta Correia-isa ashi. Pasisa ali nung inyatsü tayongba kümdar ta ashi.
“Tesasatsüka tasürtem timba kümdar aser tang tashi nung nisung 417 asüba jangjaogo,” ta pai ashi.
Yipru den tzünglu tesashi aruba ajanga Buzi aser Pungwe tzüküm pokdang aser tzü kanga sashia ayim tenzük.
United Nations Office for the Coordination of Humanitarian Affairs (OCHA)-i Honibarnü ashiba agi, Buzi aser Zambezi ayong tzüküm ano pokdangtsü ana nung lir.
“Tzümetsü asemshia mao tashi atar külenang Mozambique nung asürtem tejangja metettsü,” ta OCHA coordinator Sebastian Rhodes Stampa-i ashi.
Kasa yipru ajanga Zimbabwe nung nisung 259 tepsetogo aser ano asür tali akümtsü imlar, ta relief agency temi metetdaktsü. Kasa mapang nung Malawi nunga yipru mait tsüngda tzünglu kanga sashia aruba ajanga nisung 56 tepsetogo.
International Federation of the Red Cross and Red Crescent Societies (IFRC)-i ashiba agi, Hokolbarnü Beira nung cholera tashidak poktetba osang angazükogo. Iba yimti nung nisung 500,000 shi alir.
Correia aser Rhodes Stampa napronglai, tang tashi nungbo cholera aser tzü ajanga menatepba tashidak dak sendakba nung kecha tebilemtsü mali ajisüaka tzü memerekba ajanga item tashidak prokshitsüsa lendong nung lir, ta ashi