Mozü aser tamangba yimsü na memeyokteptsüla: Amitabh Bachchan

New Delhi, November 20 (Agencies): India tamangba yimsü jenti amangba linük ka süaka, nüburtemi tamangba yimsü aser mozü achibaren na memeyokteptsü tajungshiba olen ka Bollywood megastar, Amitabh Bachchan-i metetdaktsüogo.

“Ni nüburtem den ajurutepa senzüdang tamangba yimsü nung ajemdaker mozü machiba telok jenti ajuruogo,” ta India nung teburculosis (TB) tashikdak meshimeshia samatsütsü mapatong nung brand ambassador, Bachchan-i ashi.

Polio mozü agütsütsü mapatong inyakdanga tamangba yimsüi memelaba yong nübur aikati pei tanur nem polio mozü mejemdaktsüba osang bushiteta lir ta arishi küm 73 tain Bachchan-i metetdaktsü.

India kübok Haryana nung ‘Call to Action: A TB Free Haryana’ mapatong tenzüktsüdang Bachchan-i iba tajungshiba olen ya metetdakja liasü.

Iba mapatong den sentaktepa, nübur nem nungdakba mozü mora agütsütsü aser TB agi shiranga alirtem talidak tonga oa parnok anepalutsü atema mobile van gari 2 tashi saya aser iba sentong nung Bachchan-i Haryana Chief Minister, Manohar Lal Khattar den külemi shilem agi.