Mozü ki tajung nüngdaker

Mokokchung kümer küm 125 ajungbamong amongba tenüng nung Mokokchung town nung alir tambu-tantsütem jadena sensaksemba sentong ka alidang parnoki Mokokchung nung tang tashi mozü ki tajung maliba ajanga timtem aser takoksa ajuruba indang jembibaji temulung ayangtsüka lir. Parnoki ashiba amaji, tang Mokokchung town nung tanur ka shirang nungbo tanutsüla mesüra tanubusangji Dimapur, Jorhat mesüra Gauhati tashi bener aotsüsa akümer. Iba nungji timtem, takoksa aser shisabolu  aika dena lir. Ibaji dang masü saka ajungben lendong nung tuluka yiruyiponger arununga ibaji anepalutsüsa doctor aser osettsüset peria maliba shisabolu agi nübortem temulung nung animesüngzüktetba tia nung lir. Aji oda, Mokokchung küm 125 tain akümdangbo Nagaland nung mozü ki tajungtibaji Mokokchung nung linütsüka bilemer. Koba tesem nung südir süaka, taneptsü angudakji nisungtem adenshitsü, anungji mozü ki tajung ka aliba ajanga iba temeket nung alirtem dena tajangzük angutsü. Iba nükla aser tangatetba nung Mokokchung nung sorkar mozü (Imkongliba Memorial District Hospital) ya asenok ajaki asen meyong ama bilema kanga temulung agüja anepalutsü aser tajungba kümdaktsütsü nüngdaker. Atangji, mozü kidang inyaktsübaji senotsü tajangzük bilema masü saka nübortem  meima tenzüktsü aser shirangertem bendanga agüja anepalutsü tangatetba aser temulungsentsü tajung adener asütsüla. Iba ama bendanga agüja nübortem anepalutsü pur medical doctor aser nurse-tem aika Ao kin nungi adoktsü kanga nüngdak kümogo. Koba mozü ki südir süaka, taneptsü tajung angutsübaji ki aser oset tajung aliba kija agi masü saka shirangertem aneptsütsü jangraba doctors aser nurse-tem nüngdaker. Aji oda, ki aser oset agi mozü ki jungdaktsür masü saka yangji inyakertemiang jungdaktsür. Iba tangatetba nung Aotsür Aor lanurtemi Mokokchung district nung aliba mozü kitem rongnung Mokokchung District Hospital (IMDH) o Impur hospital na toktepa ajungtsüla. Aotsür Aortem medical azüngertem aika mapa nung lir aser ano tezüngdaka aika lir. Item jagi Mokokchung district nung mozü ki tajung akatsüsa ano khen bendanga agütsüshir inyaktsü mapang tongogo. Mozü tajung akabaji taneptsü angudak dang masü saka shiranger anepalurtem arua amongba ajanga mozü kiji raliwalirtem aruba tesem tajung (Medicak tourists spot)  ka akümer. Aji oda, Mokokchung nung alirtema Mokokchung mozü kidang anepalu mesütet tangaleni yoktsübaji shirangertem asoshi timtem dang masü saka asenok asoshi maksü lir. Mokokchung ya Nagaland nung alir Naga nunger asoshi tiyongtsü ka nung kümteta lir. Anungji, Mokokchung nung Naga nungertem asoshi taneptsü dang masü kaketshisatsü aser tanüla chiyongtsü tajungtiba angutsüla. Item khuret aser temoatsütemji angateta Aotsür Aor takar aser temetetertemi Mokchung district nung aliba sokar mozü kitem ajak shitak ayuba dang masü saka ano private mozü ki dena tajungba küma lapoktsü mulungtettsüla. Tanü putu nung nisungtem asoshi tenüngdaktibaji taneptsü angudak mozü ki ya lir. Akhidang asen tsüraburtem libaliro den tanü asenok libaliro medemdangra asenokbo kodanga meshirangtsü amai bilemer. Asen tsüraburtembo ki ka nung azü, an aser ak den külemi dang liasü. Ibaji dang masü saka tasümang dena ki telong nung shirepa ayu. Metsümeshidak balaka yanglua mali asü aser tanü asüng amai anogo shia sapon amshia tzü mechigu. Ajisüaka, parnokbo kangabo meshirang. Item libaliro denji tanü asenok libaliro medemdang nungbo asenokbo kodanga meshirangtsü amai merükmejur, chiajemer aser süoshi sübor saka tanü putu nungsa teshirangba shiranger, kechiyong alima nung tzü mopong menenadokogo. Iba ama putu ka nung anema alitsüba nüngdak ya meimchir nüngdaktem rongnung tenüngdaktiba kümogo. Iba nüngdakji asenoki Mokokchung district nungi agütsütettsüla. Iba atemaji asenok maneni shisalemsateptsüla aser sentong yanglutsüla.