Mozü kidang anepalur alitsüla

Nagaland nung sorkar mozü kidang doctor aser nurse shitak maliba ajanga tapayutsüka aser tesasatsüka tanur asoba mapang tetsür aika süogo aser ano tanurtema sozükli aika süogo ta Human Rights Law Network (HRLN) telok ajanga metetdaktsübaji shitak aser iba jagi temulung kanga ayanga bilemer. Atangji, mozü kidang nisung masütsü ta masü mesüra mozü kidangi taneptsü bushia arur ajak aneptsü ta masü, kechiyong nisunger arishi aser aneptsütsüba tashi aser taochijibo Tsüngrem ket nung dang lir. Ajisüaka, tanü Nagaland nung alirtemi aginüba nüngdakjibo mozü kidang shiranger anepalurtem shitak lidaktsüner. HRLN teloki ashiba agi, Indian Public Health Standard ajanga lateta aliba ama Community Health Center (CHC) ka nung shirangertem anepalutsü asoshi Surgeon ka, Gynecologist ka, Medical Officer ka, AYUSH doctor ka, Pharmacist ka aser nurse 10 alitsüla. Tang Nagaland nung CHC kongsa lapoka ali, item tesem nung alir yimten aser lokti tentettem tanishirtemi parnok asoshi lapoktsüba CHC nungji Indian Public Health Standard-i melaa aliba ama doctor aser nurse-tem peria melira ola adoktsüla. Ashiko, CHC kar nungbo AYUSH doctor ka nem Surgeon aser Gynecologist mapa ajak nungloka toktsür inyakdakja alitsüa akok.Idangji mozü kidang kümzüktettsüba nisung to mekümzükteti südaktsür. Aji oda, HRLN teloki Nagaland nung atalokba otsü ka ashiba agi, sorkar mozü kidang tanur pongo tetsü ka tanur asotsü aru aser iba aonung terka ako shi nung tanur tetsür chanu ka aso. Iba mapang doctor mali nurse asemi la anepalua liasü. Tanurji sor külen tetsüji ajungbena teberem aser tebok ashitsü tenzük. Anungji, la anepalur nurse-temi la temang nung timtemji jungjunga mereprangi tapi agidang ajem tutsü aser capsule ka agütsü. Iba mozüji agir külen la temang tamajungba aküm aser anepdang süa adok. Iba ama kodanga memenoktettsüsa takoksa ajurutsüsa mozü kidang inyakertemi inyakba anema HRLN teloki okadak Nagaland Health & Family Welfare department anema Public Interest Litigation (PIL) agüja lir. PIL tetezü nübortem ajungtsü atema okadak ken o benokba, anungji okadak obendangertemi item ken o temji memenui yakta agizüka angadangtsü imlar. Aji oda,  2010 küm nungi tang tashi nung mozü kidang anepalur shitak maliba ajanga tanur asodang tetsür 12 aser tanur sozükli 251 asüba osang RTI ajanga nguteta lir. Ajisüaka, shitakba züngdangdi asünungbo tasübaji iba dang nungi teimba asütsü ta bilemer. Nagaland nung mozü ki aika nung doctor-temi maor, anungji doctor melen nurse-temi dang inyaker. Shirangertem asoshi lendongji aji lir. Ano, mozü ki kar nungbo nurse-a malir, iba ama tejashitsü saka temeimtsü tensa mapnag ka nung asenok lia dokogo. Ano, aji dang masü saka Delhi nungi Nagaland nung shirangertem asoshi yokba sen  agi shirangertem matonger saka ketdangsertem lemsaa agir. Item ama shiranger mezüngmeshiba aser parnok meyong rakzüka agiba ochimashi mapatem anema HRLN telok okadak ken o (PIL) 20 agüja lir. Iba kisüng jagi Nagaland nung sorkar mozü kitem agi mozü ki mesüka terabo junga akümtsü imlar. Nagaland nung mozü ki kar nungbo ita piyong nung doctor ken danga maruba otsü lir. Aji oda, tesem kar nungbo sorkar mozü kidang shiranger anepalutsü yokba doctor-i mozü kidangi marur saka senden alidang aser office mapa inyaktsüsa akümdang dang arur. Iba ama doctor mulungjangji nübortem asoshi takoksa ajurudak lir. Atangji, tangbo Nagaland nung mozü ki reprangba mapaji ‘communitised’ süadoker asünungji, mozü ki majungbaji  sorkar nung alir yimsüsür aser ketdangsertem kija aitsütsüla masü saka mozü ki lapoka akadak yim, mepu mesüra kiyong “Education Committee”nung ketdangsertem shilem tuluka lir asütsü. Mozü kidang anepalur maliba agi, shirang dang ali kimong dena yoka bendangleni aor saka asenoki asen alidak mozü kiji shitak alitsüla ta ola madoker. Asenok ya ano nüchi maküma ta iba jakla jagi sayur. Ibaji senso shiai jungjunga bilemdangangma.