Mozü kidang inyakertem nungi sen katizüker; Covid 19 putetsang medical report mangu

Dimapur, April 14 (TYO) : Atangji, tang ya alima ajak nung Covid 19 tashidak wara mekokteti raraba mapang lir, ajisüaka Nagaland nungbo wara tonga marudangyongi, terenemtsü junga merenemtetba agi, teka metongtsüsaba tensa tia ka nung ketdangsertem aser nübortem ajak shisabolutepa angur.
Ano, iba ama mapang ka nung Dimapur nungbo mozü kidang inyakertem nem ita sen talila temloker agütsütsü melen, parnok ita sen nungiang katizükba agi, talisa, ita sen tila achir tilartembo kanga mepelai lir.
CMO Dimapur nungi sangdongba osang ka nung, parnok inyakertem ajak March ita sen nungi Gazetted purtem senpak 1000, Grade III purtem nungi senpak 700, Grade IV purtem nungi senpak 500, Adhoc Grade –III purtem nungi senpak 200 aser Adhoc Grade IV purtem nungi dena senpak 100 katizüktsü asoshi metetdakja lir.
Iba senji ”Office Welfare fund aser maintenance” atema ta shia lir.
Anosa osang ka ajanga angazükba agi, Dimapur nungi yokba nisung ka dak Covid19 tashidak puteta lir ta Social Media nung Assam Medical Minister-bai metetdaktsüba dak alema, ano pa indang medical report tejangja Nagaland government ket tonga ali asü maliar mejangjateter.
Osang kar ajanga, Nagaland nung Covid 19 tashidak agi shiranger kar danga Covid mozü ki asütsü shimteta aliba mozü kitem nung yaritsüsa atalok nungbo, shirangertemjibo yutsür doctor-tem asoshi tashidak memenatsüsa teni tebang nembangba mask dena junga renema mali ta angazükba agi, Mokokchung nung IMDH mozü kidang ketdangser ka den asüngdangtep dang, “Covid 19 agi shiranger anepaludang teni tebang nembangtsü mask karbo yoka lir saka mopung tamajung nokdangtettsüsa respirator maket, anungji temaba menden nung alirtem dang shiogo,” ta metetdaktsü.
Iba ama tashidak den aleptepa raraba mapang, item osangtemji angazüka tanü Dimapur District Hospital nung inyaker tongti ketdangsertemi sangdong ka nung ashiba agi, tang tashi nung Covid 19 agi shirangertem yaritsü asoshi ICU nung yipten 6 lir aser tanga takdangtem nung yipten 63 lir.
Iba denji doctortem atema sübotsü aser mask shitak peria lir ta metetdaktsüogo.
Iba denji Dimapur District Hospital nung 500 kv transformer ka amenlokdagi aser PHED purtemi tzüa tutsüdagi aser ano mozü ki meketa lenmang black topping yokdagi ta Dimapur mozü kidang ketdangsertemisa metetdaktsü.
Shingaia osang mejangja ser kecha memetetdaktsüner aser tajungba küma renemtsü atema tai tuteta ashibatembo ajak pelashishia agizüktsü ta parnokisa metetdaktsü.