Mozü mamshiba lu

Asenoki alu meyimnür kechiyong alu ayimtsüba mapa ya kanga tasak amai asenoki bilemer. Ibayongji, asenoki chiyongtsü alitsü sen-ang bushir aser bazaar nung chiyongtsü techinüba ajak alia achir. Atangji, alu ayimtsübaji tasak saka kodang asenoki bazar nung aliba chiyongtsü nung aliba miim mozü indang metetdir, asenoki itemji mechinütsü aser peisasa pei peribo züsentettsüsa aluang yimnütsü. Iba mapangji asenok ajak asoshi tongogo. Tanü India nung nütsüng crore noklang ka dak tali lir aser item ajak asoshi chiyongtsü nüngdaker. Ajisüaka tebilemtsü kaji, item nübortem ajak peria chiyongtsü züsentettsübaji ali temo melena amshiba mozü aser tsünüsenpongtsü raksatsüba shirurutem südaktsütsü amshiba mozütem mamshiiang alu meyimtettsü. Iba jagi aluyimertemi mozü tapu balala amshia alu ayimer aser nübortem paikaji  chiyonger anüngtsüsa züsentetter. Shidi asübo ibaji temoatsü aser takok tuluka, kechiyong iba amaji ka mozü amshia alu tululu meyimtet asübo nisung aika aya agi süla. Ajisüaka, ano külen temang asoshi bilemdangdangbo, tanü putu nung aika aser tekaratiba nung züsentettsü asoshi mozü tapu balala amshia züsentetba aonsutsü, süngjanglijang, shi aser ango ajak ya miim achir amai dang lir. Item chiyongtsü züsentetdang amshiba mozü tapu ajakji chiyongtsü nungji lir aser item jagi tashidak akümer aser nisung taküm arishi temdokdaktsür. Iba ama tekümdangtsü aser asensasa asen asoshibo mozü mamshii chiyongtsü züsentettsü nüngdakba tangatetba ya Assam nung aluyimba nung scientist aser aluyimer Samir Bordoloi Brehostibar nü Dimapur nung Aor teintet lanurtem kar den shisalemsatepdang metetdakja liasü. Atangji, aluyimer ta asüdang, jet ta sensaker ta asenok mulungjangi arur. Ibayongji, lanurtem shingaia alu meyimner. Iba tangatetbaji tai ta mapa agi sayuba nisungji Samir ya lir. Samir ya Agriculture Science azüngba nisung ka lir aser tanga pa Assam Agriculture University nung Board of Management nung züngsem lir. Pai government mapa toktsür mozü mamshiba lu ‘Organic Farming’ tenzük aser tanübo Jorhat nung  par luji agri school amato kümer school aika nungi kaketshirtem aluyimba indang angazüki arur. Paibo mozü mamshii tekong lu ayimtsü aser alu toktsüdang karaa aienba süngdong atemtsü ajungshir. Aji oda, ali temo melena mozü amshitsü melen süngo tu agi ali temo yanglutsüla aser alu tulu meyimaka pei peri aonsutsü adoktsü atema ki anasa atsübosa anepalutsü nüngdakba indang pai tangatetba agüja jajar. Atangji, mozü amshia züsentetba chiyongtsü achitsüba ya tetsübutsüka lir. Iba jagi tanü asüng chirtem yabo küm neter tashi nungbo arishi temadoktsü ta asadangtetter. Asenoki Andra Pradesh tashi nungi bener aruba ango achiba nung ya dena mozü lir, kechiyong anogo aika bener jajayonga tamajung makümtsü asoshi mozü tutsür külenang rüjep den külemi süngden nung bener yoker. Iba kasaji asenoki achiba an shi aser ak shi ajunga ya mozü agi karakaraa indaktsür achiba chiyongtsütem lir, anungji asenoka karakaraa aser yirayiraa aiener aser yamaji melamelaa asür. Item timtem aser takoksa nungi asenok jenbua alitsü asoshi akok tashi asenoki bazaar nung ayokba jang, aonsutsü aser süngjanglijang machitsüla. Aji oda, kodang asenoki asenoksasa atsü nung mesüra alu nung mozü mamshii züsentetba chiyongtsü chidir, iba jagi sen kümzükba dang masü saka anema alir aser arishi alanger. Tashidak shia mozü lir aser tebilemtsü shia takoktsü lenmang lir. Iba amaji Tsüngremi yangluja lir, anungji aonsutsü anasa ayi adokbaji menüngsar tzü nung meyokteper arak nung iba jagi aonsutsü raksatsüba shirurutem asütsüa akok. Iba amaji tendanga aser aluyimba nung mongin nisung Samir nunger ama den asüngdangtepa alu yimra, iba jagi alu melamelaa jungjunga yimtettsü. Idangjibo aluyimertemsa takarba, temang tajungba aser akümtaketba asütsü. Tanü lanurtemi item ama aluyimertemji kümtettsüla.