MP 114-i Judge Loya asüba ken o SIT nem agutsütsü akhang

New Delhi, Tsüklai 09 (Agencies): Opposition MP 114-i temepishiba shidi ka nung sign süa Tir, Ram Nath Kovind dang CBI judge B H Loya asüba ken oji Supreme Court-i ketdangsüa Special Investigation Team (SIT) ka nem bushisüngdangdaktsütsüla, ta takhangba agutsü.
Ano opposition party 13 nungi teshimtet telok kati Tir ajurua Judge Loya asüba onük nung o lemtepa liasü. Iba senden tembangba sülen Congress Tir, Rahul Gandhi-i, Tir Kovind-i iba atemaji inyaktsü ta shiogo, ta metetdaktsü.
“Temepishiba shidi nungji party 15 nungi MP 114-i sign süogo. Pa (Judge Loya) asüba nungji temelung malemtsü lir. Melung malemtsüsa ano nisung ana süogo. Tiri telangzüba tajung ka agutsüogo,” ta Rahul-i metetdaktsü.
Opposition MP temi, Supreme Court-i ketdangsüba SIT-i dang iba ken o bentettsü, ta shia iba ken oji CBI mesüra NIA nem buhsisüngdang mesüdaktsütsüla, ta ashi.
“Judge ka melung melemtettsüsa asüba ajanga Lok Sabha aser Rajya Sabha naprongla nungi MP aikati ibaji bushisüngdangtsü atema SIT ka tentettsüla ta bilemer. Iba ken o junga bushisüngdangtsü atema Judge Loya aser par kibong dang sentsüh lir,” ta Rahul-isa ashi.
2014 küm Justice Loya asüba ken o SIT ka tenteta bushidaktsütsüla ta temepishiba ken o ka benokba tanü Chief Justice Dipak Misra-i angadanga liasü.
Tanü iba ken o tembanga mejembitet aser maneni Tsüklai 12, 2018 nüa kasa ken o angadangtsü.
Tamalen Supreme Court-i Maharashtra sorkar dang CBI judge asüba post mortem osang agüjang ta tuyua lir.
Loya yagi Sohrabuddin Sheikh asüba ken o angadangba mapang nung 2014 küm Luchii ita 14 nü pa ajungbena asü.