MP 25 anentsüba magienra PM dang wako tanak sayutsü: Cong

New Delhi, August 05, 2015: Bodhbar nü New Delhi nung Congress Party Tir Sonia Gandhi aser MP temi Parliament kima Centre sorkar anema lungkak aita yimyim ayimba noksa nung angur. Taoba mapang Indian Cricket ketdangser Lalit Modi anema bushisüngdangdagi, aser Bharatiya Janata Party lenir kari pa yariba nung ajemdaker iba ken o nung External Affairs Minister Sushma Swaraj aser Rajasthan Chief Minister Vasundhara Raje na pei menden nungi aludaktsütsüla, ta Congress-i akhanger.

Chennai, August 05 (Agencies): Tanü Chennai nung Tamil Nadu Congress state unit-i, tawa Lok Sabha nung Speaker Sumitra Mahajan-i Congress MP 25 anentsübaji magienra August 7 nü Ato kilonser, Narendra Modi-i Chennai semdangba mapang pa dang wako tanak sayutsü, ta sangdongogo.

Congress MP 25 tashi anogo pongunü anentsüba asoshi lungkak aitba mapang TNCC Tir, E V K S Elangovan-i, “Onoki tanen makai lungkak aittsü,” ta ashi.

Congress MP 25 anenja alibaji tekaraba nung magienra aser parnok Parliament nung shilem magidaktsüra Congress lenirtem aser züngsemtemi iba asoshi tejashi sayua August 7 nü Modi-i yimti semdangba mapang pa dang wako tanak sayutsü, ta pai osangbenertem dang ashi.

Hokolbar nü Chennai nung National Handloom Day sentong nung Ato kilonser Narendra Modi adentsü sentong lir.

Madhya Pradesh nung Vyapam ochimashi ken o aser Lalit Modi ken o nung Congress-i mapang talangka nungi External Affairs Minister Sushma Swaraj aser den state Chief Minister ana, Vasundhara Raje aser Shivraj Singh Chouhan nunger pei menden nungi aludaktsütsüla ta akhanger, aser opposition temi kasa takhangbaji agüja Parliament House anaprong junga magiteti arudagi.

Senden nung rongrong adokdakja senden junga magitetdaktsüba atema August 3 nü Lok Sabha Speaker Sumitra Mahajan-i anogo pongu asoshi Congress MP 25 tashi anenja liasü.

Lok Sabha Speaker-i Congress MP 25 anendaktsüba dak sentakba nung Sonia-i, India aser democracy asoshi iba ya tammang anogo ka lir, ta yakünü shiogo.

Chennai nung Elangovan aser senior state Congress lenirtemi temelaba makai lungkak ait ta shia police-i lenirtem kar pua liasü.