MP Anantkumar-i Hegde aitsü

New Delhi, Tsüklai/February 4 (Agencies): BJP MP Anantkumar Hegde-i, Mahatma Gandhi lenisüba kübok nüjiso asoshi raraba ya jilushi tuluka liasü, koba British nunger den tangatettep aser teyari nung inyak ta ashiba tanü parliament nung Congress lenir Adhir Ranjan Chowdhury-i kanga mejungi aitsüogo.
“Tanü parnoki Mahatma Gandhi mezüngmeshir. Parnok ya Ravan chirtem lir. Parnoki Lord Ram sülen anidakertem tilutsür,” ta Lok Sabha nung Congress lenir Chowdhury-i ashi.
Opposition lenir aikati Hegde olen aitsüogo, koba par party-ia dena magizük. Osang ajanga ashiba agi, BJP-i Hegde dang taoba hopta lokti senden nung jembiba o atema tatok meshitsü shiogo.
“Item lenirtem ya police tem ket nungi tazük chia mali. Parnok nüjiso asoshi raraba ya jilushi ka liasü. British nungeri temelaba agütsür item lenirtem yagi inyak, Koba chichiba rara ka masü. Nüjiso asoshi rara ya tangatettep maparen ka liasü,” ta MP-i ashi.
Kasa mapang nung Hegde-i tanü, pai Mahatma Gandhi tenüng mamshi, ta shiogo.
“Media nung kechisa sayudar iba ya teyazü lir. Ni political party mesera Gandhi tenüng tetshia mejembi. Ni Gandhi mesera (Jawaharlal) Nehru mesera nüjiso asoshi raratem ka danga tetshia lira kü dang sayuang,” ta Uttara Kannada nungi MP-i ashi.
Mahatma Gandhi’er semchir Tushar Gandhi-i Twitter ajanga, “Bapu nüjiso asoshi raraba ya jilushi ka liasü ta Hegde-i ashibaji shidak. Iba julushi ya kanga tesashi asüba ajanga colonisation aser India nunger alar tia nung toktsüba angatettsü asoshi British nunger tenük lapoktsü,” ta ashi.