MP aser MLA temi Covid vaccines agitsü atema ajungshitsüla: Om Birla

New Delhi, June 24 (Agencies): Lok Sabha Speaker, Om Birla-i MP tem, MLA tem aser public lenirtem dang nüburtem nem coronavirus vaccine indang junga angatetdakja vaccine agitsü atema ajungshitsüla, ta metetdaktsü.

“Iba wara nungi nüburtem kümzüktsü atema assembly, legislative council, panchayat aser municipality ama institutions nung lenirtemi coronavirus indang angatetdaktsütsü atema public awareness campaigns ayongzüka agitsüla,” ta Lok Sabha Speaker-i metetdaktsü.

All India Presiding Officers Conference nung jembidang Birla-i, “Vaccine dak sendakba nung nüburtem ratamadar, anungji vaccine indang junga angatetdaktsütsü atema Public lenirtemi meranga inyaktsüla,” ta ashi. Iba sentong ya video conferencing ajanga agia liasü.

“Vaccine atema awareness campaign agitsüji kanga tongtibang, kechiyong Centre sorkari linük tesem ajaklen arrshi küm 18 ser temapurtem atema angati vaccination programmes tenzükogo,” ta paisa metetdaktsü.

Senden nung pai Presiding officers dang, Kota nung coaching institutes-i coronavirus wara ajanga tsürabur anaprong asür chirnurtem nem angati coaching agütsütsü, iba denji külemi tanenzükdak agütsütsü, ta metetdaktsü.

Lok Sabha Speaker, Birla ya Rajasthan kübok Kota nungi MP lir.