MP CM Shivraj Chouhan-i kaketshir ka ama shilem agitsü

Bhopal, January 31 (Agencies) : Madhya Pradesh chief minister Shivraj Singh Chouhan kaketshirtem dang bhanja-bhanji (nephew-niece) ta ajaba ajanga pai parnok den tesentaktep tajung yanglua lir aser taruba ita pai sorkar school ka nung kaketshirtem den classroom nung adentsü.
Tribal Development Department aser Department of School Education nati ‘Mil Banche MP’ Abhiyan (Let MP Read Together) sentong kübok Chouhan-i iba ya inyaktsü. Iba sentong ajanga kaketshirtem kaket azüngtsü yimya sübadaktsütsü aser parnok oshioben tajungba kümdaktsütsü meranger.
Shivaji Nagar nung aliba Sanjay Gandhi Middle School nung taoba mapang Chouhan -a kaketshir ka liasü aser pai iba school nung kaketshirtem den shilem agitsü. Taoba mapang iba school dang 1446 Middle School ta jaya liasü.
Madhya Pradesh chief minister-i iba school nung class VI nungi VIII tashi azüng.
Iba anogo nung Divisional Commissioner Ajatshatru Srivastava-i Vivekanand Nagar nung, Collector Nishant Varvade-i Rajiv Gandhi School nung, IG Yogesh Chaudhary-i Central Jail nung aliba school nung, CEO Zila Panchayat Ashish Bhargava-i Sarojini Naidu School nung aser SP Arvind Saxena-i Eintkheri nung sorkar school ka nung tesayurtem ama shilem agitsü.