MP CM tenangzükba sentong nung Mamata aser Mayawati nata jaok

Bhopal, Luchii/December 15 (Agencies): December 17 nü Madhya Pradesh Chief Minister menden atema Kamal Nath tenangzükba sentong agitsü, aser iba sentong nung adentsü atema Congress-i party balala nungi lenirtem aika jaokogo.
Tukuben tashi Chhindwara menden nungi MP aser tang Madhya Pradesh state Congress unit Tir, Kamal Nath-i Bhopal nung aliba Jamboree Maidan, BHEL nung CM menden atema tenangzükba agitsü.
Yashi osangbenertem den jembidang Nath-i, tenangzükba sentongji December 17 nikongdang 1:30 ako nungi Lal Parade ground nung agitsü ta metetdakja liasü, saka tanü sentong agitsü tesem melenshiba osang metetdaktsüogo.
Congress-i ashiba agi, iba sentong nung nisung timba dentettsü atema tesem melenshi.
Tanü osangbenertem den jembidang Nath-i, “Kü kija tenangzükba agitsü,” ta metetdaktsü. Iba tetezü minister menden balala atema ano nübo meshim südi, ta bilemer.
Küm 15 sülen tang mezüng Congress nungi Chief Minister ji Nath asütsü.
Madhya Pradesh nung Congress nungi tesüsabuba CM inyakbaji Digvijaya Singh liasü. 2003 küm BJP-i Congress madak takok ngua liasü, iba sülen küm 15 lir tang Congress-i state nung takok angur.
Congress osang ajanga ashiba agi, UPA chairpreson Sonia Gandhi aser party Tir Rahul Gandhi na dak alia Nath-i iba sentong nung adentsü atema West Bengal chief minister aser TMC tongti, Mamata Banerjee, Andhra Pradesh chief minister Chandrababu Naidu, BSP chief Mayawati aser SP Tir, Akhilesh Yadav nunger jaokogo.
Iba dak alia Congress-i yimsüsüba state ajak nungi Chief Minister tema jaokogo.
State nung sorkar akumtsü atema Bahujan Samajwadi Party (BSP) aser Samajwadi Party (SP) nati Congress yaritsü sangdonga liasü.