MP Kenye-i Losatephe yimtsüng lapoktsü

Losatephe, Rongchii (April) 24 (TYO): Nagaland nungi Rajya Sabha Member of Parliament, K.G. Kenye-i tanü Phek district kübok Losatephe yimtsüng tenzükba sentong nung aden.
Iba yimtsüng ya Nagaland-Manipur arrtsü anasa lir aser 2017 küm state sorkari agizük. Iba yimtsüng nung kilen 84 nungi nütsüng yongsük 332 lir.
Mongputeni (October) 12, 2017 nü state sorkari Losatephe yimtsüng recognized asü.
Sentong nung o jembidang Kenye-i Losatephe nunger nem tenüngsang agütsüdang, “nenoki National Highway 29 nung ochishia shishilembaba atema tenüng tajung nguteta lir” ta ashi.
Paisa yimtsüngtem dang rongsenkettsüng jenjang ajungkettsü atema longjemer mapa inyaktsü ayongzük.
20 Meluri Assembly Constituency nungi MLA Yitachu-ia o jembidang, ajembanga ayuba aser tashiyim agi inyaka aoba inyakyimtem ali tashi asenoki tajung kecha mongutettsü, ta ashi.
Sentong nungsa 17th Chizami A/C nungi MLA Kezhienyi Khalo, Chakhesang Public Organization (CPO) tir Kekhwengulo Lea aser Phek ADC K. Mhathang Tsanglao nungertemia o jembi.
Kasa sentong nung Losatephe village council chairman Khrowete Lasuh-i yim kümtetba osang metetdaktsü aser Losami village council chairman Keziiwelo Akami-i tesentepertem pela agizük.