MP, KG Kenye-i model village atema Bade village shim

Dimapur, July 08 (TYO): 2014 küm India sorkari tenzükba yim terenlok project, Sansad Adarsh Gram Yojana (SAGY) phase-II kübok Rajya Sabha MP, KG Kenye-i model village atema Dhansiri sub division kübok Bade village shimogo, aser iba ya yim model village tanabuba asütsü.
Iba scheme ya Members of Parliament (MPs) ajanga inyaker aser nodal officer ji Deputy Commissioner asür. Tamalen Kenye jakdang MP inyaksang, asür Khekiho Zhimomi-i model village atema Ikshe village shima liasü.
Iba sentong nung jembidang Kenye-i, iba sub division kübok temsüa aliba yim aika lir, saka model village atema Bade yim shim, kechiyong iba yim ya yimtenren tesendaktep yanglutsü atema tesem tajung ka nung lir aser kidanger state tem dena anasatepa lir, ta metetdaktsü.
Iba dak alia iba yim ya Naga nunger nüjiso bushiba putiotsü den sendaktepa lir, ta paisa ashi.
Model village atema Bade shimba nungji yimdaklirtem atema khuret lir, ta shia paisa yimdaklirtem dang iba project takok ngua inyaktettsü atema shilem tajung agitsü mepishia metetdaktsü.
“Bade village ya sobaliba tiyongtsü ka kümdakjang aser kishikina yimtem atema tatishitsü tajung aketba yim ka südakjang,” ta paisa ayongzük.
Iba project tajungtiba nung inyakettsü atema Nodal officer aser tanga department nung ketdangsertemi shisatsü tajung agütsüba atema pai parnok danga peblaba metetdaktsü.
Dimapur Deputy Commissioner aser Nodal officer, Kesonyu Yhome-ia iba sentong nung jembia liasü.
Sentong nung Rev. Dr. Nuvocho Dzudo-i meshiteta sarasadem aser Bade Village Council Chairman, Nesalie Thopi-i iba yim indang putiotsü tongmelang agi metetdakja liasü.