MP nung moko anemertemi GST kübok bidi züngoktsü akhanger

Bhopal, May 17 (Agencies): Madhya Pradesh nung moko anema nokdakertemi Goods and Services Tax (GST) kübok bidi ayokba atema saru agitsü takhangba agütsür.
Küm shia bidi achiba ajanga nisung 48,100 asüba atema iba campaign ya tenzüker.
Madhya Pradesh nung cigarette dang nungi bidi teimba ayoker ta Nandi et al ajanga bushitetba osang British Medical Journal nung adoktsüogo.
Madhya Pradesh nung bidi dak sendakba mapa inyaker nisung 7,03,487 lir.
Moko anema nokdakertemi ashiba agi, tasürji bidi industry nung inyaker nisung 14 rongnung ka asüba ama lir.
Bidi alongertem rongnung noklang nung shilem 70 den tema tenük, tar aser nervous system nung timtem aliba aser ano parnok tesadang ka tango sashiba dak sendakba tashidak aliba bushitet.
MP State Minor Forest Produce Corporation (MPSMFPC) sentong ka nung Additional Principal Chief Conservator of Forest (APCCF) Azad Singh Dabas-i ashiba agi, sorkari bidi yangluba tendu patta nungi sen aruba dak dang temulung agütsür.
“Tashidak agütsüba tendu tou bendenertemi küm nung hopta ka nung asem tashi ka dang bendenteteter. Anungji asenoki iba inyakyim melena tanga mozü tou, süngjang aser resin tem ayimtsüla aser ibaji ajanga tribal tem mapa angutsü aser sorkara sen crore aika saru sarutettsü” ta Dabas-isa ashi.
Voice of Tobacco Victims (VoTV) atema MP patron, Dr Lalit Shrivastava-i ashiba agi, “Asen Finance Minister-i Madhya Pradesh ya tajungba kümdaktsünür ta ni amanger aser pai demerit category nung bidi dak saru agitsü atema pusema nungittsü imlar.”