MP nung NCP nem Dy CM aser Cong nem Speaker menden agütsür

New Delhi, Yimpoksüi/November 28 (Agencies): Maharashtra nung Shiv Sena-NCP-Congress teloktep sorkar nung CM ji Shiv Sena nungi asütsü; Deputy CM ji Nationalist Congress Party (NCP) nungi aser Assembly Speaker ji Congress party nungi asütsü.
Yasüng Shiv Sena, NCP aser Congress senden amenba sülen Brihostibarnü NCP lenir, Praful Patel-i, NCP-i deputy chief minister menden meshi, ajisüaka parnoki tenüngbo magütsü, ta metetdaktsü.
Congress nem Assembly Speaker menden aser NCP nem deputy Speaker menden agütsütsü, ta paisa metetdaktsü.
Brihostibar aonung Sena tongti, Uddhav Thackeray-i chief minister tenangzükba agitsü aser party asemprongla nungi minister anana tenangzükba agitsü, ta pai metetdaktsü.
Tamalen party osang ajanga ashiba agi, Shiv Sena aser NCP napronglai minister menden 15 angutsü aser Congress-i minister menden 13 angutsü.
Maharashtra nung Minister timba agia 43 dang shimtsü akok.
Tang teloktep sorkar nung Shiv Sena MLA 56, NCP MLA 54 aser Congress MLA 44 lir.
Arishi küm 59, Thackeray-i Chief Minister tenangzükba agiba ya state nung küm 20 sülen tang mezüng Shiv Sena-i chief minister menden angur asütsü.
Tenangzükba sentong nung adentsü atema NDA sorkar maliba state tem nungi Chief Minister tem, Congress-i yimsüsüba state tem nungi Party Tirtem, taoba mapang Ato kilonser, Manmohan Singh aser Congress lenir ana- Sonia Gandhi aser Rahul Gandhi na jaok, ajisüaka Sonia o Rahul nabo iba sentong nung madentsü, ta osang angazüker.
Sorkar tenangzükba agiba sentong nung adentsü atema Shiv Sena-i state kübok district balala nungi aluyimer 400 dak tema jaokogo.