MP nung nisung 21 tsükset

New Delhi, Rongchii 18 (Agencies): Yasüng Madhya Pradesh kübok Sidhi district nung kiyir benjung nung adener telok ka mener aliba mini-truck ka Sone ayong nung tsükokba lendong nung nisung 21 tashi süogo, ta tanü police ketdangser kati metetdaktsü.
Yasüng 10:30 ako meta Sidhi district headquarters nungi kilometer 42 shi pilar iba gari tsükoka liasü, ta police-i ashi.
Gari jagi long jara ka nung tsükoktsüba sülen apu nungi feet 60-70 shi lua tzü maliba tesem ka nung tsükok, aser yasüng tashi nung nisung 15 asüba osang jangjaa liasü, ta police-isa metetdaktsü.
Osangbener den jembidang Rewa division nung Inspector General, Umesh-i, “Tang tashi nung nisung 21 asüba jangjaogo. Tang tashi nung onoki tasümang 21 ngutetogo, parnok rongnung kentener telok ka nungi züngsem asem densema lir,” ta ashi.
“Kiyimba benjung nung adenertemji Sidhi district kübok Devsar jila nungi Muslim nunger kibong ka nungi liasü. Yirua alirtemji Sidhi district hospital nung aniokogo, aser teyaritep mapa maneni inyakdar,” ta paisa ashi.
Yasüng iba osang angazükba sülen Madhya Pradesh Chief Minister, Shivraj Singh Chouhan-i iba lendong nung asürtem shia kibong nem senotsü teyari lakh anana aser yirua alir shia nem sen 50,000 agutsütsü, ta sangdonga liasü.