MP nung ozüng alema keyi tepseta ‘Tiger Balm’ yanglur

Bhopal, September 19 (Agencies): Madhya Pradesh nung ozüng alema arem shiruru tepsetertemi alima nung kanga nüngtugu süa amshiba ‘Tiger balm’ mozü yanglur.
Item nisungtem yagi Satpura Tiger Reserve (STR) nung aliba keyi tepseter temo nungi totzü agizükba jagi nguya-ngushi aser tebur miim oset nung timtem alirtem atema mozü yanglur, ta osang kar ajanga ashi.
Forest department nungi Special task force (STF) aser Satpura Tiger Reserve (STR) nungi ketdangsertemi lokteper mita aoba mapang ozüng alema arem shiruru tepsetertem shirnok international gang dena tesendaktep lir, parnok ket nungi keyi temo ta mulung melemi bilemba pongdang ana pua lir. Iba keyi temo ya Hoshangabad kübok Sakhai yimtsüng nungi, Srivas aser Itarsi yimtsüng nungi Yunus na ket nung liasü.
Ita ka piyong mita aoba mapang tan ya tena den ano ozüng alema arem shiruru tepseter 10 tashi puogo.
“Noki keyi temo ta temulung melemi bilemba totzüji tetendangdaki bener yokogo. Kanga junga tendangba sülen ang ibaji shitakba keyimo asü masü-ar metettsü aser parnok mapa tamajung tasen jungkai adoktsü,” ta STR nung director R P Singh-i ashi.
Item tetendangbaji Centre for Cellular & Molecular Biology (CCMB) Hyderabad nung agitsü aser Wildlife Health Monitoring Centre (WHMC) Jabalpur nung DNA tendangtsü.
Ano ibala mesükba mapa tamajung inyakertem aputsü asoshi Delhi-ia team balala yokogo aser temo dang masü saka teret-a dena tendangdaktsütsü bener yokogo.
“Teküp mangu tashi parnoki shitakba keyi ji tepset asü metepset’ar mejangjatettsü,” ta STR director-isa ashi.