MP nung police-i Rahul Gandhi apu

Tawa Madhya Pradesh, Mandsaur nung police-i longkak aiter aluyimertem pongu khasetba anema Brihostibarnü, June 08, 2017 nü Mumbai nung Youth Congress nung inyakertemi longkak aita train nokdangba mapang police-i parnok apuba noksa nung angur. 

New Delhi, June 08 (Agencies): Tanü Madhya Pradesh, Neemuch nung police-i Congress tatong Tir, Rahul Gandhi puogo, ta osang ka ajanga metetdaktsü.
Madhya Pradesh nung Congress pusemertemi Rahul Gandhi meina aluyimertem tenüngsanga yimyim ayima aodang police-i pa apu. Rahul den Congress nung inyaker noklang aika den Rajasthan Congress tongti, Sachin Pilot aser Madhya Pradesh nung Congress MLA, Jaiwardhan Singh nata liasü aser parnoka court tetuyuba nung apu.
Parnok ajak cement company ka indang guesthouse kati anir ao, ta police ketdangser kati ashi.
Mongolbarnü Mandsaur nung aluyimertem longkak aitdang police-i injang yokba ajanga Naya Gaon, Neemuch nungi aluyimer 5 khaseta liasü.
Tanü Police-i Rahul Gandhi den party lenirtem- Digvijay Singh aser Kamal Nath nunger nokdangtsü atema sentong yanglua liasü, ajisüaka parnoki tashi mangai tashiyim amshia state telungi ai.
Gandhi-i asür kibongtem ajurutsü tebilemba nung Rajasthan, Chittorgarh district kübok Dalia yim nungi metre 100 shi jajaa Madhya Pradesh telungi ia liasü.
“MP-i mayaokdang Gandhi-i Nimbahed nungi motorcycle ka sülen sanger kilometer 5-7 shi ao,” ta IG Udaipur Anand Srivastava-i ashi.
“Gandhi tayimtsü ajanga Delhi nungi Udaipur tonga aru. Iba sülen pa gari ka nung aru, aser tesüsa motorbike ka nung tatsüka arur tetsüng agi jaja,” ta paisa ashi.
Osang angazükba agi, Gandhi den gari 150 aser nisung 2,000 jungnüa liasü.
Ano tanga osang ka nung tanü Rahul-i, Ato kilonser, Modi-i sensakertem masü saka takartem dang ang sentsüh atoktsü jangrar, ta aitsü.
“Ato kilonser Narendra Modi-i linük nung takartem sentsühbo tokteter saka aluyimertem sentsühbo metokteter,” ta Rahul-i ashi.
Centre aser MP sorkar aija pai, “Mandsaur nung aluyimertem asübaji Modi aser Chief Minister Shivraj Chouhan na tai ajanga lir,” ta ashi.
Osangbenertem den jembidang Rahul-i, “Pai (Modi) aluyimertemi züngsentetba nung jenjang shitak matakzüktsür, parnok nem tajangzük magütsür, senotsü teyari magütsür. Saka pai parnok nem injang dang agütsür,” ta aitsü.
Iba sülen mapang tatsüka dang lirbo police-i pa apu.