MP, Rio-i Chief Minister, Shurhozelie nem tenüngsang agütsü

Dimapur, February 23 (TYO): Taoba mapang Nagaland Chief Minister aser tang MP teinyakdak, Neiphiu Rio-i shidi ka ajanga Dr. Shurhozelie dang, pa Chief Minister atema tenangzükba agiba asoshi tenüngsang agutsür, ta metetdaktsü.
Shidi nungji Rio-i Shurgozelie dang, “State nung yimtenren nung tain rongnung ka ama nai aika ajangshia aliba aser shisatsü ajanga state tejangzük angutsü imlar. Nü lenisba kübok tesem nung tali tashi itshitsü aser regional party-i tali tejakleni aotsü,” ta shia lir.
“Terenlok aser rongsenkettsüng ajungkettsü atema asen alizüngtem tongtettsü asoshi ni state den akokba tashi amalitepa yariteptsü. Tongtibangsüa yimjung atema ni meranga inyaktsü aser külemi longjemer asenokji yimtenren telatetba kaajanga teti asoshi Nagaland nung yimjung bener arutettsü. Asen party-i election mapang nung nüburtem atema inyaktsü nangzükogo aser election mapang asenoki nüburtem dang nangzükba nungi ni masetshitsü ta ni nü dang züngbong ashir. Nai lenir tain kar cabinet nung shimokba atema ni pelar,” ta shidi nungjisa shisema lir.
“Nü kümsük piyong nai takok angutsü aser nü lenisüba kübok Nagaland-i aika tongtettsü ni sarasademtsür,” ta Rio-isa lemsatep.