MP Rio-i lenirtem nem tenüngsang agutsü

Dimapur, March 11 (TYO): Tanü state assembly election nung party balalai takok anguba nung ajemdaker Nagaland nungi MP, Neiphiu Rio-i lenir balala nem tenüngsang agutsüogo, ta sangdong ka ajanga metetdaktsü.
Rio-i shidi ka ajanga Ato kilonser, Narendra Modi dang, “Tang agiba election nung BJP-i takok anguba atema ni nü dang iba shidi ajanga tenüngsang agutsür. BJP-i takok anguba, talisa Uttar Pradesh aser Uttarakhand nung takok anguba tongti kuliji nü lenisüba ajanga lir, nüburtemi nü dak tamang katetogo. BJP-i Manipur nunga junga inyaktetogo. Yangi-a takok anguba kuli rongnung nai nüboyimba ajanga lir,” ta lemsatep.
Rio-i shidi ajanga Ram Madhav danga, “Tan agiba election nung takok anguba atema ni nü den BJP nem tenüngsang aguja shidi zülur. Party-i UP aser Uttarakhand nung junga inyaktetogo, aser Manipur nunga junga inyaktetogo. Item ajak tenüngji Ato kilonser, Narendra Modi aser BJP Tir, Amit Shah lenisüba den külemi nü lenisüba nung party tenteti junga inyakba ajanga lir,” ta ashi.
“Asenok senteper linük tejakleni aniba maparen nung BJP-i aniba NDA sorkar tali tashi itshitsü, ta ni imlar,” ta paisa metetdaktsü.
Rio-isa Nagaland Chief Minister Shurhozelie danga, “Tawa Manipur general election nung NPF party-i menden pezü nung takok anguba angashia ni pelar. Anungji ni nü den party nem tenüngsang agutsür,” ta metetdaktsü.
“Nai meranga inyakba aser nü lenisüba tajung ajanga party-i iba jenjang tongtetogo. Tarutsü nung Naga people’s Front-i ano tajungba inyaktettsü ta ni amanger,” ta paisa shisem.