MP temi Parliament nung nübur atema onüktem jembitsüla: Pranab

New Delhi, December 08 (Agencies): Parliament House anaprong nung senden mekatetba atema tanü Tir, Pranab Mukherjee-i tatartem aija, yimlibilema nenok mapa inyakang, ta ashi.
November 16 nü Parliament senden tenzükba anogo nungi tang tashi Lok Sabha aser Rajya Sabha naprongla nung senden thinena mekateti arur, kechiyong November 8 nü Ato kilonser Narendra Modi-i sen tamshidak anentsüba onük nungi sorkar tashi nung aliba aser opposition MP tem maneni o toktepa arur.
Iba dak sentakba nung Tir, Pranab-i, “Tsüngrem tenüng nung, nenoki nenok teinyaktsü mapa inyakang. Parliament nung onüktem jembitsüji nenok mapa lir. Parliament nung rongrong adokbaji tagizüketla masü,” ta ashi.
Defence Estate Day Lecture 2016 sentong nung “Reforms for a stronger Democracy” onük nung jembidang Tiri, “Longkak aittsü atema masü saka linük atema inyaktsü asoshi nüburtemi shimteter lenirtem Parliament-i yok,” ta ashi.
Parliamentary maparen nung longkak aita rongrong adokba ya yimya ka kümogo, ta pai tesasaba olen ka ashi.
“Longkakji mashii tesem ka nung ayongzüka katettsü,” ta shia pai MP tem dang Parliament nung nüburtem atema tongtibang onüktem nung o lemteptsüla aser o tokteptsüla, ta ajungshi.
Yashi BJP lenir tain, LK Advani-ia Parliament senden makatetba atema Speaker aser Parliamentary Affairs minister na aija liasü.
Tanü agi anogo 15 nübuba Lok Sabha senden mekateter, kechiyong sen tamshidak anentsüba onük nung opposition party temi yimyim ayima longkak aitba manener.
Tanü Lok Sabha senden tenzükli Congress lenir, Mallikarjun Kharge-i iba onük tenzüknüa liasü saka Speaker Sumitra Mahajan-i memelai Question Hour tenzüka liasü. Ibaji ajanga Congress, Trinamool Congress aser Left party tem nungi züngsemtemi sabangleni oa sen 1,000 aser 500 notes anentsüba onük nung o tokteptsü takhangba agütsü.
Speaker-i opposition party tem takhangba magizükba ajanga opposition züngsemtemi yimyim ayima longkak aitba sülen Speaker-i senden minute 20 thinen.