MP, Tokheho-i Nagaland nung tang rongdak tensa lemsatep

Dimapur, Luroi/August 02 (TYO): Lok Sabha MP, Tokheho Yepthomi-i tanü Luroi/August 2 nü Parliament House nung tang state nung rongdak tebilemtsütem benoka jembiogo, ta PRO(IPR) Nagaland House, New Delhi, Kuolie Mere-i sangdong ka ajanga metetdaktsü.
Pai ashiba agi, Nagaland nung Rongchii/April nungi tenzüka tang tashi tzünglu kanga sashia aruba ajanga lendong ajurua arudar, talisa Chiteni/July 18 nüngi tenzüka tensa tamajungba kümogo aser ibaji ajanga state nung aliba nüburtem anogoshia inyaksangshi nung timtem ajurudar.
State yimtiba, Kohima den district balala, talisa Phek, Kiphiri aser Tuensang districts nung anentsüh aluba ajanga tesendaktep lenmang nokdangogo; Iba dak alia tzümetsüng ajanga nisung trok tashi ponger ogo aser anentsüh aluba tesem nung ki raksaba sülen kibong aika aeinshidaktsüogo, ta pai metetdaktsü.
Phek district kübok tenemlen nungi anentsüh aluba ajanga Sidzu ayong temdanga kilometer 1 shi tzü tulu metsünga lir, aser ibaji mashie mapang ka nung pokdanger ayimtsü, koba ajanga tsünglanglen aliba yimtsüngtem aser tzülu raksatsüba dang masü saka Assam nung Golaghat aser Jorhat tesem kanga mejungi kongshitsü, ta paisa metetdaktsü.
MP Tokheho-isa, state nung railways, waterways aser airlines maliba ajanga gari lenmang nungdang metaloker alir, ta ashi. Pai Speaker dang temelaba meshia Home Minister dang Nagaland nung lendong agi kongshir aliba tesemtem semdangtsü asoshi ketdangser ka yoktsü atema mepishiogo, ta kasa sangdong ajanga metetdaktsü.