MP tzümetsüng nung nisung 15 süogo, tzü ajemdar: Chauhan

July 10, 2016, nü Madhya Pradesh, Bhopal nung tzünglu sashia arua tzü metsüngdang yimti nung aliba kiyong ka nung nüburtemi pei talidak ki toktsür aoba noksa nung angur.

Bhopal, July 10 (Agencies): Deobarnü Madhya Pradesh Chief Minister, Shivraj Singh Chauhan-i, state tzümetsüng lendong nung tajemba agi nisung 15 süogo, ta ashiba den külemi MeT office ajanga taruba anogotem nunga tzünglu sashia arutsü metetdaktsüba sülen ketdangsertemi tensa azüoktsü atema nüngdakba meratem agidar, ta ashi.
Tangbo tensa tajungba kümdar, ajisüaka Bhopal, Indore aser Ujjain nung tzünglu sashia arutsü akok, ta pai osangbenertem dang ashi.
“Rewa division nung tensa ajak azüokteta lir aser tesem aika nung tensa tajungba kümdar, tzümetsüng tensa tajungba kümdar kechiyong tzü ajema kümdar. Tesem kar nung tzünglu nana liasü saka tzünglu sashiabo maru,” ta paisa ashi.
Bhopal, Indore aser Ujjain divisions nung tzünglu sashia arutsü takzüteta lir, ibayongji DC tem dang kümküma alitsü metetdaktsüogo, ta pai ashi.
State Disaster Response Force (SDRF)-i nüburtem yariba atema pelaba metetdaktsüba den külemi Chauhan-i, teraksatsüba asadanga takoksa angurtem, talisa sensakertem nem teyari peria agütsütsü atema survey agitsü tuyuogo, ta ashi.
“Tzü level ajema akumba sülen tzü ajanga prokba tashidak balala poktettsü akok, anungji Health Department dang Municipal Corporation aser local ketdangsertem den yaritepa nübur ajak nem tzü temerük agütsütsü atema mapa lemzüktsüogo,” ta Chief minister-isa metetdaktsü.
“Meteorological Department-i tzünglu sashia arutsü takzütetogo, anungji district administrations dang nüngdakba mera ajak agitsü tuyuogo. Tangbo tensa azüokteta lir. District administration-i mapa tajung inyakogo. Tayongzükbatem koktettsüsa onok renema lir,” ta paisa shisem.
“Tanü ni telephone ajanga Rajnath Singh (Union Home minister) den jembiogo aser pa dang tan tensa indang metetdaktsüogo. Ni iba tensa indang Ato kilonser dena jembitsü,” ta paisa ashi.