MPCC-i SC oshidang pelaa agizüker

Imphal, January 12 (Agencies): Tawa Supreme Court-i Jammu & Kashmir nung tenokdangbatem atema oshidang agütsübaji Manipur Pradesh Congress Committee (MPCC)-i pelaa agizüker, ta MPCC-i metetdaktsü.
J&K nung internet services nokdangba dak sendakba nung Hokolbarnü SC-i, internet ya fundamental temeden ka lir, aser iba ya o sadoka jembitsü temeden kübok aiter, ta oshidang agüja Kashmir administration dang anogo tenet tsüngda tenokdangbatem reprangshiba sülen yimjak nung sangdongang, ta tuyua liasü.
Imphal nung aliba MPCC office nung osangbenertem den jembidang party vice president aser MPCC otongdar, T Mangibabu-i SC oshidang lepshia, internet nokdangbaji fundamental temeden alema lir, ta ashi.
Mangibabu-isa, state nung BJP-i aniba sorkar aser Centre nung BJP-i aniba NDA sorkari tashi tim masüba nung amshir aser ozüng tesahi benoker, ta aitsü. State nung Citizenship Amendment Bill (CAA) anema longkak aitba mapang nung Imphal West district nung ita ana curfew ozüng benokbaji tim masü, ta ashi.
“Alima nung democracy tulutiba India lir ta züngshiaka BJP-i democracy noksa tenüng menüktsüogo,” ta pai ashi.
CAA ya timi benokba ozüng ka asübo nüburtemi pelaseta agizükla, CAA indang awareness agütsütsü menüngdak süla aser CAA senden nung adentsü atema BJP-i nüburtem nem sen melemtsüla, ta paisa ashi.