Mrs. Lhusi Haralu alima nungi pilaogo; TR Zeliang & DPC nungeri mang ayimer

Dimapur, November 17 (TYO) : Mongulbarnep Mrs Lhusi Haralu asüba osang angashia kanga aoksar aser temulung raksar, ta Nagaland chief minister TR Zeliang-i sangdong ka nung metetdaktsü.

“Tanü Nagaland Peace Centre lapoker küm 50 ajungba jubileemung nung ni adentsü lia iba osang angashiba ajanga ni kanga aoksar, kechiyong asür Lhusi Haralu mapang talangka Nagaland Peace Centre nung inyaka aruogo aser taoba ita tuang la aser lar telok den kü indang Residential Office, Kohima nung ajurutepa liasü. Iba mapang onok tanü Hon jubileemung dak sendakba onüktem lemsatep” ta TR Zeliang-i sangdong nung shia lir.

“Asür Lhusi Haralu ya Nagaland Peace Centre nung Executive Director ama inyaka aru aser la den sensaksemdang lai Peace Centre ya puti otsü nung tongtibang süa tetshitsü atema Nagaland nung yimjung tekaratiba nung bener arutsüla ta kü dang ashi” ta TR Zeliang-isa ashi.

“1990s mapang lar adiana Chalie aser Tobu Kevichusa na tepset saka lai iba tejashi aketba inyakyim agizük. Nisungtemi la dang kodaser nai iba mapa tamajung inyaker nem tatok agütsür aser tatalokba amateter ta asüngdangdang, ‘Aibelenertemi tatok memeshi nung kodaser nai tatok agütsütettsü. Nisung kati Yisu Khrista tenüng nung tatok agütsütsü akok, saka tarutsü nung asenoki mapa tamajung meinyaktsü atema tatalokba jibo mamatsüla’ ta-sa lai langzü” ta TR Zeliang-i tesüiba otsü bilemteta sangdong nung shia lir.

Nagaland Chimef minister-isa ashiba agi, “Yasüng la Peace Centre indang Golden Jubilee sentong reprangshimdang Handel-i mejemba Messiah ken atentsü aliba bilemtet aser idangji lai King George II-i iba ken atendang nisung ajaki Tsüngrem nem akhümtsübu agüja noktaktsü tetuyuba agütsüba ama, iba ken atendang tesentepertem ajak noktaktsüla ta ashiba osang ni lar kinüngertem dang nungi angazük aser iba yagi kü mulungjang nung kanga kongshiogo.”

Küm aika lai shilem tajung agia aruba Peace Centre indang Hon Jubilee sentong atongtsü ghonda ishika dang lia la iba akümli toktsür aoba atema kanga sasa bilemer. Iba asüku mapang nung ni aser ozü kibong den Nagaland nung alir ajak tenüng nung tasür kibong den mangyim lemsateper aser asür tanela yimjung nung anisüngzüktsü sarasademtsür, ta TR Zeliang-isa metetdaktsü.

Dimapur Press Club (DPC)-ia sangdong ka nung taoba Easter Mirror yimozülur Bano Haralu tetsü Lhusi Haralu asüba atema asüku lemsatepba metetdaktsü.

Asür Lhusi Haralu ya A Kevichusa aser Manie Kevichusa na jala tantsüla liasü aser la ya August 17, 1932 nü aso. La ya asür Padmashreee Thepfoorya Haralu kinüngtsü liasü aser la taküm alidang Nagaland State Social Welfare Advisory Board, Nagaland Council for Child Welfare, Kohima Branch of Family Planning Association of India aser Naga Mothers’ Association (NMA) nung inyak, ta DPC sangdong nung shia lir.

1984 küm la Nagaland Peace Centre nung executive director inyaktsü shim aser lai iba mapa teinyakdak lia la akümli nungi pilaogo. Lai jabaso asem den jala pungu, semchirsemnur 22 toktsür alima nungi pilaogo. Iba mangyim tejashi mapang nung Tulusang Tsüngremi lar kibong nem tashi aser tesünep moajang ta sasarademtsür, ta DPC-i sangdong nungsa metetdaktsü.