“MS Dhoni: An Untold Story” Pakistan nung menokdang: CBFC tekolakba

Karachi, September 29, 2016 : Pakistan CBFC tekolakbai ‘MS Dhoni: An Untold Story’ film Pakistan nung menokdang, ta ashi.

Iba film ya India nung September 30, 2016 nü sayatsü.

India nunger ODI captain Mahendra Singh Dhoni taküm otsü indang film, Bollywood nung yangluba ‘M.S Dhoni: An Untold Story’ Pakistan nung nokdanga mali, ta Pakistan censor boards otangdari ashi.

Parnoki Neeraj Pandey-i direct asüba film ya certification atema-a süng ano mebenok ta ashi. India nung Maharashtra Navnirman Sena (MNS)-i Pakistan nunger film nung shilem agirtem nokdangtsü ta osangbenertemi metetdaktsüba sülen iba film Pakistan nung nokdangtsü ta asüba olulu ya adok.

“Iba film ya Certification atema ano tebenoka mebenok nung kodaser onoki nokdangtettsü ? Linük nung aliba film atema inyakertemi iba film atema ‘NoC’ ano memeshi,” ta Central Board of Film Censors nung Chairperson Mobashir Hasan-i The Express Tribune osangbenertem dang ashi.

“Pakistan security, shinga dena telemsa maliba aser kidanger linüktem den putepa alitsü tebilemba nung film ka tanga menokdanger. Onok temzüng ozüng nung aliba ama onoki akok tashi telemtetba ajak, ajak ajungtsü atema agir,” ta Hasan-i shisem.

India nunger film tem atema khen tanga tetuyuba kar arua lir mali ta süngdangdang pai, “Tang tashi nungbo khen tanga arua mali. Onoki teti inyakba yimya nung inyaker. Taoba hopta nunga onoki ‘Banjo’ film agizüka tera kata cut mesüi sayudaktsüdar,” ta langzü.

Sindh Board of Film Censors Secretary Razzaq Khuhawar-i, “India nung aliba osangbenertemi tera mashileni bilemer. Onoki toktepbaji junger ta bilemer kechiba süra ibaji ajanga Pakistan film tem nung terenlok angur. Tensa majungba ajanga film nokdangtsü onok tebilemba kecha mali,” ta ashi.

“Taoba hopta onoki ‘Banjo’ ‘U’ rating nung certify süa agizük ajisüaka nüburtemi kanga mesapuba ajanga iba film sayuba tanem tanemi anendar. Aji onok masü saka nüburtem mulung. Onoki film nokdaktsü kecha tetuyuba magütsü,” ta pai shisem.

“M.S. Dhoni: The Untold Story” film alemba company, IMGC Entertainment-i linük ana tsüngda tensa majungba ajanga iba film Pakistan nung mesayatsü lemtet.

Linük ana tsüngda tensa tamajungba akümtsüsa kecha meinyaktsü. Dhoni ya India nunger hero ka lir anungji yangi tebilemtsü ka lir, ta company nung media aser marketing manager Sabina Islam-i ashi.

Pakistan nung tang Bollywood film Banjo aser Pink sayudar.

Sushant Singh Rajput-i tongti shilem agia aliba M.S. Dhoni: An Untold Story film ya India nung Hokolbarnü sayatsü.