MSKT-i sentong ka ayongzüka tesayurtem tushi

Dimapur, September 6 (TYO) : India lima ajunga den külemi Mokokchung Senso Kaketshir Telungjem (MSKT) office-i acha-ayanga Tesayurtem Anogo nung sentong ka ayongzüka agi.
Sept. 6, 2015 nikongtsütsü agiba sentong nung Mokokchung yimdak Govt. High School, Mkg. Vill., Arjuma Primary School aser Yimtsüngda Primary School nungi parnok tesayur 52 tashi nem Kulikakettem renema agütsü.
Sentong nung Wb. Kilangyanger Lkr, President-i tesayurtem aser tarur pelaa agizük, Wb. N. Sobu, Pastor, MBA-i tesayurtem atema sarasadem aser Wb. T. Imti Pongen, VEC Chairman-i tajungshi o jembi.
VEC Chairman-i tesayurtemi kanga meranga tanurtem anitetba aser Education Committee den amalitepa aruba atema pelaba ashi aser tesayurtem ayongzüka jembi.
Sentong nungsa Wb. Lanu Atsongchanger-i, “tesayur kadi ozüng tesashi agi masü saka taküm libaliru aser tashitemetet ajanga tanur ka anitettsü aser nai sayuba tanurtemji alima lenir aser Tsüngrem tenzüker ka ka adoktsü nükla nung yur sayutsüla” ta tesayurtem ayongzük.
Iba sentong nung tesayur Saceendra Archary shiba Govt. High School, Mkg. Vill. nung küm 29 tashi inyaka arur, pa Sorkari District Teachers Award agütsüba konang nüngsang tepela tulu lemsatepba liasü.
Sentong nung tesayurtem ajak tenüng nung nung Wt. Nungshienla ajanga MSKT aser yimer ajaki yaritepa aruba asoshi pelaba lemsatepa den Kulikaket tajung agütsüba asoshi peleba metetdaktsü. Sentong nung mendenji Kr. Toshinenla aser Kr. Lanujungla na liasü.