MTABC, Mon-i arogo lennirtem atema HIV & AIDS sentong agi

Dimapur, July 22 (TYO) : July 19, 2016 nü Mon jila nung aliba arogo balala lennirtem atema ‘Church Advocacy on HIV and AIDS’ sentong ayongzüka agi.
Iba sentong ya DAPCU-i Mon Town Baptist Pastors’ Fellowship (MTBPF) den yaritepa Mon Town Ao Baptist Arogo nung ayongzüka agi aser Legislators’ Forum on AIDS-Nagaland (LFA)-ia teyari agütsü.
Sentong nung Deputy Commissioner aser DAPCC Chairperson, W.Honje K-ia guest speaker ama shilem agi.
Sentong nung MTABC pastor, Rev. Lipoktemjen-i temoatsü meshia sarasadem aser iba sülen Dr.Yingnei K, Medical Officer I/c LAC+ DH Mon ajanga ‘Basics on HIV and AIDS’ presentation agütsü.
State Consultant, LFA-Nagaland, Dr.Vinito L.Chishi-i Legislators’ Forum on AIDS, Nagaland indang osang tatsü agi metetdaktsü aser pai MLA tem dang HIV & AIDS programme nung yaritepba atema pelaba metetdaktsü.
‘Kechiba Arogoi shilem agitsüla’ ta asüba onük jembidang, Dr.Vinito L.Chishi-i arogoi inyaktettsüba onük trok indang lemsatep.
HIV & AIDS alirtem asoshi arogoi inyaktsüba mapa trokji- Shirangertem aria bilema anepalutsü, testing & counselling nung yariteptsü, volunteers nübo agütsütsü, bendanga amshiba tangatetba melidaktsütsü atema tesayuba agütsü, temang anema alitsü indang sayubentsü agütsütsü aser chiyungtsü tajung & mozütem agütsüba nung yariteptsü lir, ta Dr.Vinito-i ashi.
Sentong nung Deputy Commissioner & DAPCC Mon Chairperson, W. Honje K-i o jembidang, Arogo ya rejutem tongtipang ka lir anungji HIV & AIDS onük atema ola madoki malitsüla, ta ashi.
HIV nokdangtsü aser anepalutsü atema Arogoi sentong tajung atonga inyaktsüla. Arogo lennirtemi parnok onük jembidang enoksema jembitettsü asoshi HIV & AIDS rajema meteta alitsü atema training agütsütsüla. HIV & AIDS tayongzükba atema Arogoi temelenshi bener arur ka ama mapa tulu inyaktettsü, ta Honje K-isa ayongzük.
Sentong nung LFA-Nagaland, Hukatoli Chopy-i Social responsibility indang jembi aser idangji lai Nagaland nung HIV & AIDS tensa indang osang metetdaktsü.
Sentong nung mendenji District Programme Officer, DAPCU Mon, Longyim Tzudir liasü aser pai arogo balala nungi lennirtem, shisalen sayurtem aser guest speaker W. Honje K nunger dang sentong nung shilem agiba atema pelaba metetdaktsü.
Sentong nung MTBPF President, Yongrichem-i anküp tepela o jembi aser KBCM Youth Director, Manai K-i tenüngsang agüja sarasadem.