MTBA-i achayanga mission “Run Mokokchung” mapa tenzükogo

ABAM executive secretary Rev. Dr. Mar Atsongchangeri mission “Run Mokokchung” tenzüktsüba mapang tangokba noksa nung angur. Mokokchung, November 28, 2016.

Mokokchung, Nov 28 (TYO): Ao Baptist Arogo Mungdang executive secretary, Rev. Dr. Mar Atsongchangeri Hombarnep Mokokchung Town Baptist Arogo-i achayangba “Run Mokokchung” ta sür mission mapa ka meshiteta sarasademer tenzüktsüogo.
Tanep iba mission tenzüka Rev. Dr. Mar Atsongchanger aser pa temeim kinüngtsü den MTBA nung tenzükertemi anir tejangrar lanurtem densema külemi Run Mokokchung uniform akhümketa semer Mokokchung police point nungi Imkongmeren Sports Complex moapu tashi asemyonga ao, yang nung jagi town hall leni asemyonga or, tesü MTBA tenla ki kima tashi asema liasü. Tanep asemyonga aoba mapang tesem-tesem nung sarasadema liasü.
Iba “Run Mokokchung” mission ya tongtibangsa Mokokchung town nung aliba nüburtem luyim ajak nung anema lidaktsüba den rendaktsütsü nükjidong yur tenzüker, ta Run Mokokchung luden nung tayonger aser MTBA Associate Pastor, Wb. Temsüwatii metetdaktsü.
Iba mission ajanga anema alitsü asoshi nüburtemi tapet exercise agia pei temang anepaludaktsütsü, yimti nung alir nüburtem asoshi sarasademtsütsü, lokti menen aser ochimashi agi shirangba anepdaktsütsü, kima-yimdong merükmeju aser anepalu shisatsü rendakja pei teinyaktsü inyakdaktsütsü, aser kilung-kima aser lokti senden nung tensa den apet awashi/wainshin benshidaktsütsü nükjidong lir, ta paisa ashi.
Lokti külemi asembaji hopta nung anaben alitsü (Hombar aser Brihostibarnep). Tejangrartemi lokti asemba nungji arua shilem agitsü asoshi paisa ayongzüka liasü.