MTBA Youth Dept-i jilushi aonung ta sür sentong ka ayonger

Mkg, Sept. 24, 2019 : Naga nunger lokti nung atalokba talisa tanü lanurtemi ajangshiba tebilemtsütem dak ajemdaker “Ojangsang” ta sür jilushi ka Sept 26 aonung 6:00 ako nungi tenzüka MTBA tenla kidang sayutsü Mokokchung Town Baptist Arogo Youth Department-i ayongzüka lir.
Iba jilushi ya ghonda ka shi lir aser iba jilushiji taoba MTBA Youth Department president aser National School of Drama alumni Imkongonen Lemturi direct asü. MTBA youth dept. atema ibai mezüngbuba mapatong ka lir aser iba ya ajanga lanurtem nem jilushiba (acting) tsütsü pei sempet sayutsü maongka lapoktsür. Iba ya ajanga shitakba jilushi yimya nung jilushiba nungi tenzüka jilushi zülutsü, sobusolemtsü, make-up, lighting, photography aser videography amala angazükdaktsütsü parnok sentong lir.
Mapang shia sentep mesüra sentong balala nung dang jilushi aiba asenoki repranga arur, aji oda, tang yabo MTBA lanurtem asoshi jilushi yimya shitakba amshia sentong agibaji ibai mezüngbuba asütsü aser iba ajanga jilushi aiba tsütsü lenmang aisü nung tajangzük angutsü imlar, ta MTBA Youth Evangelist Monglieri ashi. Iba ya ajanga Tsüngremi agütsüba sempet sayutsü sabang tajung ka asütsü, ta paisa shisem.
Iba sentong atema jilushi aitsüpurtem aser iba mapa achayangertem joko ita ka shi anibelema kanga meranga renemshia arudaki. Arogo tenzükertemia iba sentong dak sentakba maparen balala nung akokba tashi nungita arudar aser parnokia iba ya ajanga tarutsü nükla tajung pateta aotsü amanger.
Iba jilushi sentong ya angati dang sayutsü, anungji, jilushi nüngja “Ojangsang” reprangi arunür ajak tayongeri pela shishia jaoker.