MTC züngsemtem longkak ait

Shillong, July, 04 (Agencies): Meghalaya Transport Corporation’s (MTC) managing director transfer sütsüba dak sendakba nung state sorkari telangzüba magütsü tsüngda, A Nikhla densema corporation staff temi iba transfer order aginang ta Center dang takhangba ka agütsütsü asoshi sentong yangludar.
“State sorkari A Nikhla ama corporation inyakyim nung temelenshi bener arutsü merangba ketdangser ka transfer meyoktettsü. La mapa nung shimoker ita teku dang lir,” ta MTC workers union tir, Ewrin Sutnga-i osangbenertem dang ashi.
Ketdangser ka mapa nung shimoker küm asembosa kasa mapa nung inyaktsüla, saka state sorkari la transfer yoktsü asoshi telemtetba agiba ya kechi tetezü, ta pai maneni asüngdang.
“Tang teinyakdak managing director-i inyakyim nung temelenshi bener arur aliba ya la transfer yokadokra amajok akümtsü ta onoki tsübua bilemer,” ta Sutnga-i ashi.
Workers Union tirisa ashiba agi, managing director kübok corporation inyakyim tanem tanemi tajungba küma arudar. Director-i revenue inyakyim nung meshidak aliba nokdangogo, koba ajanga MTC kanga mejungi kongshir liasü.
Ajisüaka pai ashiba agi, state sorkari tang tashi nung iba ken o lemtetptsü asoshi union nung inyakertem jaoka mali.
MTC nung mapa inyakertem longkak aitba ajanga raliwalirtem aser local tem dak kongshir lir, kechiyong inter-state aser district bus service mapa meinyaki lir.
June 27 nungi tenzüka longkak aitba ajanga raliwalirtem aika MTC counter tem nungi rail ticket mekatsüba amala maparen meinyakteti parnok kangshidar.