MTIFF mapang Kolkata nung ‘The Letters’ film sayutsü

Kolkata, August 25, 2016 : Hokolbarnü nungi tenzüka pezünü amongtsü aliba, Mother Teresa International Film Festival (MTIFF) benjong mapang Kolkata nung “The Letters” film den ano nüngtugu documentary tem kar sayutsü.
Yaküm International Catholic film festival mapang Vatican nung mezüng sayuba sülen “The Letters” film India nung mezüng sayutsü kanga yongyaseta ata liasü. Iba film nung tongti shilem agir actress Juliet Stevenson aser director nati temaba award ka ka ngua liasü.
1940 tatemlen aser 50 tetenzüklen atalokba otsü nung ajemdaker yangluba film ya William Riead-i zülua direct asüba lir. Film nung kanga dak akhümket nisung kati ochiba lenmang nung jaja-a lai sensakertem den ka kümer inyakba otsü angutsü.
Juliet-i shilem agiba film yagi Mother Teresa-a taküm ali amai bilemdaktsür,” ta MTIFF nung global director Sunil Lucas-i ashi.
Sunil Lucas-i India nung aliba yimti aika den tajemba agi linük 50 tashi longa jajatsü.
Times of India (TOI) den jembiba mapang Lucas-i, “Iba film benjong amongba mapang nisung ka kija tashi agi takok anguba otsü tem sayutsü,” ta ashi.
‘The Letters’ ya Mother Teresa meyong miim shiditem lir. Minute 82 talang film ya  linük 10 aser continent 4 tashi nung tangokba lir. Iba film reprangba sülen Mother Teresa-i meranga inyakba ajanga yimsüsüba, tamangba aser lokti balala nung tetsüdaktsü ajak madak takok ngutetba tali jangjatsü.
“Mother Teresa taküm otsü rangben amai keta aliba film ji ibai asütsü aser iba film ya teshimtet tesem—Indian Parliament, UN headquarters, Vatican aser White House—nung sayuba sülen lokti dangbo tang agi tanabenbuba ang sayutsüba lir,” ta Lucas-i ashi.
Kolkata sülen India nung MTIFF benjong ya Shillong nung September 6 nungi 9 tashi amongtsü.
Kolkata Missionary of Charity aser SIGNIS India-i MTIFF benjong ya lokti tapu ajak sendenba tesem asütsüla ta mepishi. Iba benjong ya Delhi, Mumbai, Bengaluru, Udaipur, Guwahati, Patna, Indore, Ranchi, Kerala nung yimti pezü, UK, Malaysia, Ireland, Italy, Australia, Thailand, Bangladesh, Sri Lanka aser China nungsa akatsü.
Iba benjongi arur mezüng pur nem free entry agütsütsü. Nandan I, II, III aser IV nung linük tenet indang film 23 sayutsü. Iba rongnung India film ti, USA tenet, France aser UK indang anana, Spain, Italy, Canada aser Japan linüktem indang film kaka dena lir.
Iba benjong ya tanga benjong dang nungi balaka asütsü kechiba süra iba benjong yabo sensaker, lokti nung mezüngsemertem aser Kolkota tepuokdak alirtemia dena arua reprangtettsü. Ano Nandan VI nungbo Mentaid, Manovikas Kendra, IICP, Asha Niketan aser tanga NGOs tem nung aliba matamabensartem arutettsüsa balaka renemtsüa lir.