MTLT & AKM nati Mokokchung district atema ola adoker

Dimapur, September 26 (TYO): Public-i timtem ajuruba osang balala lemsatepba aser ano Mokokchung district nung alirtem ajangzüktsü aser renloktsü atema Mokokchung Town Lanur Telongjem (MTLT) aser Ao Kaketshir Mungdang (AKM) nati mapa kar inyaktsü mulungtetogo.
Hopta aika olemtepyonga aruba sülen MTLT aser AKM ketdangpurtemi Mokokchung jila nung gari lenmang majungba, Interstate Bus Terminus (ISBT), Khensa nung mapa metenzükba, PMEGP beneficiaries (2014-15) nem senotsü magütsüba aser IMDH (Civil Hospital) indang tia atema inyaktsü telemtetba agi.
MTLT aser AKM ketdangpurtemi bangdak ketdangsertem aser head of departments den ajurutepa tebilembatem lemsatep aser shiditem agütsüogo, ta MTLT tir Imkummeren Jamir aser AKM tir Imkongwati nati sangdong ka nung ashi.
Item onüktem atema MTLT aser AKM nati tatem matong tashi inyaktsü. Anungji bangdak ketdangsertem aser state sorkari temulung agüja tekaratiba nung mapatem kümteta inyaktsü mepishir, ta Imkummeren aser Imkongwati natisa metetdaktsüogo.
1. Imkongliba Memorial District Hospital (IMDH):IMDH ya Mokokchung district atema dang masü saka temeket aliba district tem atema tongti mozüki ka lir. Anungji, IMDH ya kanga junga ketdang asütsüla aser timi anepalutsüla. Ajisüaka, tawa IMDH nung metokmeperi aser timtem aika ajurur.
Mozüki nung doctor aser nurse temi parnok tajungtiba agüja inyaka arudar saka tanga teinyaktsü aika lir. Iba asoshi MTLT aser AKM ketdangpurtemi IMDH ketdangsertem den ajurutep aser tebilembatem lemsatep. IMDH nung doctor aser technician tem peria mali anungji state sorkari iba onük atema tekaratiba nung mapa inyaktsüla ta telok anati takhangba agütsü.
2. Circular Road, Mokokchung town: Mokokchung jila nung circular roads anepalutsü atema 2014 küm PWD (R&B)-i Urban Development Department nem mapa agütsü. Ajisüaka, Mokokchung nung aliba gari lenmangtem kangasa mejungi kümogo. Iba asoshi MTLT aser AKM-i District Urban Development Officer, Mokokchung dangi shidi ka züluogo aser lenmangji lateta aliba ama yanglutsü takhangba agütsü. Gari lenmangtem meyanglushi tashi Urban Development Department-i ‘completion certificate’ magütsütsüla ta parnokisa akangakanga shiogo.
3. Inter-state Bus Terminus, Khensa: Khensa nung aliba Interstate Bus Terminus (ISBT) ya tanü tashi mapa metenzüki lir. Mokokchung Deputy Commissioner-i nija aser NST bus tem ISBT, Khensa nungi senzütsü atema tetuyuba agütsü, saka tanü tashi ibaji mapa küma meinyaker. ISBT, Khensa ya North East Council (NEC)-i teyari agüja yanglu aser ISBT infrastructure tajungtem rongnung ka lir. Iba asoshi MTLT aser AKM nati Deputy commissioner dang tekaratiba nung ISBT lapoka mapa inyaktsü atema takhangba agütsü.
4. Prime Minister’s Employment Generation Programme (PMEG): Mokokchung nung zünger mapa manguba lanur aika lir aser entrepreneur tem aika lir. Iba asoshi lanur aikati Prime Minister’s Employment Generation Programme (PMEGP) atema tenüng agütsü saka tanü tashi Centre sorkari agütsüba teyari sen magütsür. Iba onük asoshi Deputy Commissioner-i tiyongtsüi aitsü aser bank tem dang tekaratiba nung sen agütsütsü tetuyuba agütsütsü atema MTLT aser AKM-isa takhangba agütsü.