MTLT-i Angami nunger pusema Gaidinliu magizüker

Mokokchung, August 26 (TYO) : Nagaland yimtiba Kohima nung ‘ranimaa’ Gaidinliu ta ajar ka nem tetushi agüja nüngshilung yanglutsü sentong anema Angami Youth Organization aser tanga Angami teloktemi noktakba nung Mokokchung Town Lanur Telongjem (MTLT)-ia pusema nungiter.

Gaidinliu ji shiba aser komala nisung ka liasü kang junga meteta lir aser shiameteter aikati la indang aika züluogo. Gaidinliu ya talila bilemloka amangba tamangba yimsü nung lennir ka dang liasü aser la British nungeri tepuokdak yua aliba India nüjiso anguba sülen chiok aser lai Naga National Council anema rara, ta Media Cell, MTLT sangdong nung shia lir.

Taoba India prime minister, Jawaharlal Nehru-i la nem kechi tangatetba nung agütsüar mejangja saka la nem ‘rani’ nüngja agütsü. Ajisüaka, iba nüngjaji Naga nunger oshi nung mali aser Naga nunger rongnung ‘rani’ mesüra ‘raja’ maliasü. Anungji Gaidinliu nem ‘rani’ nüngjaji atala agütsüba ama dang lir aser India prime minister kati ‘rani’ ajaba ajanga iba nisungji tamanger ka aser tamarener kibong nungi ta züngshitsü makok, ta MTLT-isa metetdaktsü.

Tanga state ka nungi tamangba lennir ka Khristan state ka nung benoktsüba aser ano Nagaland yimtiba nung la indang kürakyanglu ka aser museum-cum-library ka yanglutsü sentong atongtetba atema MTLT-i kanga süngmanga bilemer.

Centre aser state sorkartemi iba mapa inyakba ajanga Naga nunger temulung yirutsüogo. Iba mapa ya lar tasoyim mesüra Delhi mesüra la sapurtem alidak ka nung inyaker asübo MTLT-i ola madokla. Gaidinliu ya Naga nunger anemer ka liasü aser la indang kürakyanglu mesüra museum-cum-library yangluba mesüra India nunger sen nung la indang noksa enoksemba ajanga lai Naga nunger anema inyakba maidoktettsü. Ibala inyakyim ajanga tesüiba otsütem maidoktettsü kechiyong Laishiba nunga “Ochi agi akoker” ta shia lir, ta MTLT-isa metetdaktsü.

Iba dak sendakba nung MTLT-i Angami nungertem den külemi noktaker aser Naga nunger ajaki iba inyakyim anema noktaktsü ayongzüker. RSS aser VHP-i atongteta Centre aser state sorkar nem mapa inyakdaktsüba ya kanga süoki ia shisadangtsüla aser item mapa anema ola adoktsüla, ta MTLT sangdong nungsa shia lir.

State sorkari iba mapatong atema jungjunga shisadangtsü ayongzüker aser kasa mapang nung civil society aser talisa Arogoi Naga nunger anema inyakba atema ola adoktsü mepishir, aji mesüra tarutsü nung asen Naga nunger lokti nung khuret aika ajurutsü, ta MTLT-isa metetdaktsü.